12.05.2025 | 12:34
Փաշինյանը #հատիկառհատիկ հեշթեգով հերթական գրառումն է կատարել
Էրդողանը Իմամօղլուի ձերբակալությունը «կոռուպցիոն հետաքննություն» է անվանել, իսկ զանգվածային բողոքի ակցիաները՝ «սադրանք» որակել
Քաղաքականություն
24.03.2025 | 22:59
Թուրքիայի նախագահ Ռեջեփ Թայիփ Էրդողանի կառավարության նիստից հետո ունեցած ելույթում Ստամբուլի քաղաքապետ Էքրեմ Իմամօղլուի և նրա գործընկերների ձերբակալությունն անվանել է «կոռուպցիոն հետաքննություն», նաև դիմել է երկրում անցկացվող զանգվածային բողոքի ակցիաներին։
«Նրանք խնդիր չունեն ոստիկանների վրա քարեր նետելու, մեր պատմական մզկիթների բակերը պանդոկների վերածելու։ Տուժած ոստիկանների, խանութպանների, վանդալների հարձակումների հետևանքով վնասված հանրային ունեցվածքի համար միակ պատասխանատուն ընդդիմության գլխավոր առաջնորդն ու նրա համախոհներն են, որոնք կոչ են արել դուրս գալ փողոց։ Այս փաստի իրավական հիմնավորումը կպահանջվի դատարանում»,- հայտարարել է նա։
Էրդողանը թիրախավորել է նաև երեկ անցկացված ընդդիմադիր Ժողովրդահանրապետական կուսակցության (CHP) նախնական ընտրությունները՝ նշելով. «Եվս մեկ անգամ ապացուցվեց, որ ժողովրդավարության մասին CHP-ի ընկալումը չի կարող բաց քվեարկության և գաղտնի հաշվարկի կատակերգությունից մեկ քայլ այն կողմ գնալ։ Ցավոք, ընդդիմադիր կուսակցության հիմնական առաջնորդները, այդ թվում՝ կուսակցության ղեկավարը, դրսևորեցին մեծ տգիտություն։ Կոռուպցիայի, կողոպուտի, կաշառակերության ու շորթման մեղադրանքներին պատասխանելու փոխարեն՝ նրանք 5 օր արել են մեր քաղաքական պատմության ամենաստոր ու անօրինական հայտարարությունները։ Դադարե՛ք սադրանքներով խաթարել մեր քաղաքացիների անդորրը։ Եթե համարձակություն ունեք, ապա զեկուցեք կոռուպցիայի, գողության, կաշառակերության մասին»։
Էքրեմ Իմամօղլուի ձերբակալությունից և ցույցերից հետո տնտեսության մեջ տատանումներն Էրդողանը պայմանավորել է պետական գործողություններով՝ ընդգծելով, թե թույլ չեն տա որևէ վնաս հասցնել այն ձեռքբերումներին, որոնք ունեն կառավարության տնտեսական ծրագրի շնորհիվ և իրականացնում են վերջին երկու տարիներին։
Թարգմանությունը՝ Էմմա Չոբանյանի
