26.06.2026 | 08:14
ԱԱ-2026. ԱՄՆ-ը պարտվեց գոլառատ խաղում, Ավստրալիան փլեյ-օֆֆում է. ՏԵՍԱՆՅՈՒԹ
ՌԴ-ն գրեթե 100 ԱԹՍ-ներով հարձակվել է Ուկրաինայի վրա․ Կիևում և Զապորոժիեում վիրավորներ կան
Քաղաքականություն
24.03.2025 | 14:37
Մարտի լույս 24-ի գիշերը ռուսական զինված ուժերը անօդաչու սարքերով հարվածներ են հասցրել Ուկրաինային։ Կիևում և Զապորոժիեում երկու մարդ վիրավորվել է, հայտնում են տեղական իշխանությունները, փոխանցում է Current time-ը։
Կիևի Ֆաստիվ շրջանում 37-ամյա տղամարդ է վիրավորվել ստամոքսի, կրծքավանդակի և գլխի բեկորային վնասվածքներով, հայտնել է Կիևի շրջանային ռազմական վարչակազմի ղեկավար Նիկոլայ Կալաշնիկը։ Նրա խոսքով՝ հարվածի հետևանքով երկու առանձնատուն է վնասվել, իսկ առևտրային ձեռնարկության տարածքում բռնկված հրդեհը մարվել է։
Զապորոժիեում ռուսական ԱԹՍ-ների հարվածի հետևանքով մեկ մարդ է տուժել, հայտնել է Ուկրաինայի արտակարգ իրավիճակների պետական ծառայությունը։
«Զապորոժիեում հրդեհ է բռնկվել ավտոտնակում, վնասվել է գազի խողովակը: Մեկ այլ հասցեում այրվում են անօդաչու թռչող սարքի բեկորներ: Պայթյունի ալիքը և բեկորները վնասել են բազմահարկ և մասնավոր բնակելի շենքերը»,- ասվում է հաղորդագրության մեջ:
Ուկրաինայի ռազմաօդային ուժերն էլ հայտնում են, որ մարտի 23-ի երեկոյից ի վեր Ռուսաստանն ուկրաինական տարածքի ուղղությամբ արձակել է 99 «Շահեդ» անօդաչու թռչող սարք և անօդաչու թռչող սարքերի տարբեր տեսակներ։ Նշվում է, որ ԱԹՍ-ներից 57-ը խոցվել են, 36-ը չեն հասել իրենց թիրախներին։
Ռուսաստանի ՊՆ-ն իր հերթին հայտնել է երկրի շրջանների վրայով անօդաչու թռչող սարքեր որսալու մասին։ Գերատեսչության տվյալներով՝ գիշերվա ընթացքում հակաօդային պաշտպանության ուժերը որսացել և ոչնչացրել են 28 անօդաչու թռչող սարք․ 12-ը՝ Բրյանսկի և Ռոստովի շրջանների, 2-ը՝ բռնակցված Ղրիմի և 1-ը՝ Կրասնոդարի շրջանի և Ազովի ծովի վրա։
Ռոստովի մարզի նահանգապետն էլ մարտի 24-ի վաղ առավոտյան հայտարարել է, որ գիշերը շրջանում անօդաչու թռչող սարքի զանգվածային հարձակում է հետ մղվել։
Թարգմանությունը՝ Էմմա Չոբանյանի
