21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
Կարմիրբերետավորները Հայաստան-Վրաստան խաղի ժամանակ 4 անձի հեռացրել են տրիբունայից
22.03.2025 | 12:42
Մարտի 20-ին Վազգեն Սարգսյանի անվան «Հանրապետական» մարզադաշտում կայացավ Հայաստան-Վրաստան ֆուտբոլային հանդիպումը: Երկրորդ խաղակեսում իրավիճակը լարվել էր տրիբունայում: Factor TV-ի տեսախցիկն արձանագրել էր, թե ինչպես են ոստիկանապետն ու նրա տեղակալներն անձամբ միջամտում ստեղծված իրավիճակին: Երեկ էլ համացանցում կադրեր տարածվեցին, որտեղ երևում էր, թե ինչպես են կարմիրբերետավորները տրիբունայից հեռացնում հայ երկրպագուների:
Factor.am-ը ՆԳՆ մամուլի քարտուղար Նարեկ Սարգսյանից հետաքրքրվեց` ինչ էր տեղի ունեցել, և ինչ հիմքով էին ոստիկանության ծառայողները մարզադաշտից հեռացնում երկրպագուներին:
Ըստ Սարգսյանի` այդ հատվածում իրավիճակը լարվել է և ոստիկանները, հնարավոր միջադեպը կանխելու համար, 4 անձի հեռացրել են տվյալ հատվածից: Սարգսյանն ընդգծեց, որ նրանց բերման չեն ենթարկել: Նշենք, որ հանդիպման ողջ ընթացքում հայ ֆուտբոլասերները վանկարկում էին` «Մելիքբեկյան, հեռացի´ր», «Հրաժարականն անխուսափելի է»:
Այդ օրը ՀՖՖ նախագահ Արմեն Մելիքբեկյանին հանդիպել չհաջողվեց:
Փոխարենը ԱԺ իշխանական պատգամավոր Սիսակ Գաբրիելյանը ֆուտբոլային հանդիպումից հետո Factor TV-ի հետ զրույցում, անդրադառնալով Մելիքբեկյանի հրաժարականի կոչերին, նշեց. «Ֆուտբոլի ֆեդերացիան մեր հետ ի՞նչ կապ ունի: ՀՖՖ-ն պետության մասնակցությամբ չի ձևավորվում»: Սիսակ Գաբրիելյանը նաև հավելեց, որ տարօրինակ կլինի, եթե իրենք պահանջեն ՀՖՖ նախագահի հրաժարականը:
Նշենք, որ Հայաստանը սեփական հարկի տակ 0-3 հաշվով պարտվեց Վրաստանի հավաքականին: Խաղին մարզադաշտի օթյակից հետևում էին նաև վարչապետ Նիկոլ Փաշինյանն ու Վրաստանի վարչապետ Իրակլի Կոբախիձեն: Նրանց կողքին էին նաև Երևանի ու Թբիլիսիի քաղաքապետները: Պատասխան մրցավեճը կկայանա վաղը` մարտի 23-ին Թբիլիսիում:
Արփի Հակոբյան
