Քաղաքականություն
20.03.2025 | 11:51
ՌԴ Սարատովի մարզի նահանգապետ Ռոման Բուսարգինը հայտնել է, որ Սարատով և Էնգելս քաղաքները մարտի լույս 20-ի գիշերը ենթարկվել են «անօդաչու թռչող սարքի ամենազանգվածային հարձակմանը», գրում է Meduza-ն։
Էնգելսում, ըստ շրջանի ղեկավարի, ուկրաինական անօդաչուների հարձակման հետևանքով կոտրվել են քաղաքի թիվ 1 կլինիկական հիվանդանոցի, ինչպես նաև երկու մանկապարտեզների և մեկ դպրոցի պատուհանները։ Էնգելսում երկու մարդ վիրավորվել է, այդ թվում՝ հիվանդանոցում գտնվող մի կին։
Astra-ի հաղորդմամբ՝ անօդաչու թռչող սարքի հարձակումից հետո Էնգելսի բնակիչներն ուժեղ ծուխ են նկատել «3-րդ ամառային քաղաք» միկրոշրջանում, որը գտնվում է Էնգելս-2 ռազմական օդանավակայանից 10 կիլոմետր հեռավորության վրա։ Նշվում է, որ ԱԹՍ-ի հարձակումից հետո Էնգելսում ռազմական օդանավակայանում հրդեհ է սկսվել։ Տեղական լրատվամիջոցները հայտնել են, թե բնակիչներին տարհանում են ռազմական օդանավակայանի մոտ գտնվող տներից, սակայն այս տեղեկությունը չի հաստատվել։
Մի շարք ռուսական տելեգրամյան ալիքներ հայտնում են, որ ուկրաինական անօդաչու թռչող սարքերը հարձակվել են Էնգելսի նավթի պահեստի վրա, որտեղ հրդեհ է բռնկվել դրանց բեկորների ընկնելու պատճառով։ Էնգելսում ԱԹՍ-ների հարձակման հետևանքով վնասվել է մոտ 30 մասնավոր տուն և ամառանոց։ Դպրոցներում դասերը որոշել են հեռավար անցկացնել։
Սարատովում, նահանգապետի տեղեկացմամբ, անօդաչու թռչող սարքի բեկորների անկման հետևանքով վնասվել է սեփական տուն, ոչ ոք չի տուժել։ Տեղում հրդեհ է բռնկվել, որը մարվել է։
ՌԴ Պաշտպանության նախարարությունը հայտնել է, որ գիշերվա ընթացքում հակաօդային պաշտպանության ուժերը խոցել են ուկրաինական 132 անօդաչու թռչող սարք, որոնցից 54-ը՝ Սարատովի մարզում։ Անօդաչու թռչող սարքեր են խոցվել նաև Վորոնեժի մարզում (40 անօդաչու), Բելգորոդում (22), Ռոստովում (ինը), Կուրսկում (երեք), Լիպեցկի շրջաններում (մեկ), ինչպես նաև բռնակցված Ղրիմում։
«Ռոսավիացիա»-ն էլ հայտնել է, որ գիշերվա ընթացքում սահմանափակումներ են մտցվել Սարատովի և Սամարայի օդանավակայանների աշխատանքում։
Թարգմանությունը՝ Էմմա Չոբանյանի
