Քաղաքականություն
18.03.2025 | 17:30
Հայաստան-Ադրբեջան խաղաղության ցանկացած պայմանագիր պետք է ներառի բանտարկյալների ազատ արձակումը։ Այս մասին CNN-ի եթերում Փոլա Նյուտոնին տված հարցազրույցում հայտարարել է Moderna ընկերության համահիմնադիր Նուբար Աֆեյանը:
Անդրադառնալով Արցախի նախկին պետնախարար Ռուբեն Վարդանյանի և մյուս հայերի դատավարություններին՝ նա նշել է, որ դրանք ամոթալի դատավարություններ են։ Նա նաև հիշեցրել է, որ նրանք ձերբակալվել են Ադրբեջանի կողմից Արցախում իրականացված էթնիկ զտումից հետո։ Աֆեյանը նշել է, որ հեռախոսազանգերի սահմանափակ հնարավորություն կա, և Ռուբեն Վարդանյանը հացադուլ էր հայտարարել՝ դատավարությանն ուշադրության հրավիրելու համար։ Նա նաև ընդգծել է, որ Վարդանյանին և մյուս գերիներին այցելում է Կարմիր Խաչի միջազգային կազմակերպությունը, սակայն Ադրբեջանի իշխանությունները փակում են այն և ՄԱԿ-ի մի շարք կառույցներ։
«Թրամփի վարչակազմից եղել են հստակ, շատ ուղիղ ուղերձներ, և ինձ ու շատերի համար պարզ է, որ խաղաղության ցանկացած համաձայնագիր, որը կնքելուց առաջ կամ դրա շրջանակում չի ենթադրում բանտարկյալների ազատ արձակում, լիովին հակասում է Թրամփի վարչակազմի առաջ քաշած մարտահրավերների հաղթահարման տրամաբանությանը և Ադրբեջանի պաշտոնյաներին ուղղված շատ ուղիղ կոչերին»,- ասել է Աֆեյանը՝ խոսելով խաղաղության պայմանագրի ու Թրամփի վարչակազմի ջանքերի մասին։
Նա նշել է, որ Թրամփի վարչակազմը երկու պաշտոնական հայտարարություն է արել՝ պահանջելով ազատ արձակել հայ բանտարկյալներին։ Առաջինը Թրամփն է արել անցած աշնանը (դեռևս որպես նախագահի թեկնածու), իսկ մյուսը՝ նրա Ազգային անվտանգության հարցերով խորհրդական Մայքլ Ուոլցը։
«Հարցեր են բարձրացվում՝ արդյո՞ք այն երբևէ կստորագրվի, քանի որ ակնհայտ է, որ Ադրբեջանն այս պատերազմը կամ այս հակամարտությունն օգտագործում է ներքին նպատակներով ու այդ ընթացքում այնտեղ ճնշում է ազատ արտահայտման բազմաթիվ դրսևորումներ: Իրականությունն այն է, որ համաձայնագիրը կարող է չստորագրվել, և եթե ստորագրվի ու բացառի բանտարկյալների ազատ արձակումը, ես չեմ կարծում, որ դրա արժեքը թղթից ավելին կլինի»,- հայտարարել է Աֆեյանը։
Թարգմանությունը՝ Էմմա Չոբանյանի
