08.09.2026 | 20:02
Անդրանիկ Թևանյանի խափանման միջոցը երկարացվել է 3, Արեգնազ Մանուկյանինը՝ 1 ամսով
Ադրբեջանում տղամարդու են ձերբակալել՝ երկրի բանակի, զինտեխնիկայի տեղակայման և տեղաշարժի մասին տեսանյութեր տարածելու համար
Քաղաքականություն
18.03.2025 | 20:18
Ադրբեջանի ԶՈՒ-ին առնչվող տեսագրություններ տարածած անձ է պատասխանատվության ենթարկվել։ Այս մասին հայտնել է Ադրբեջանի պետական անվտանգության ծառայության (ՊԱԾ) մամուլի ծառայությունը, փոխանցում են տեղական լրատվամիջոցները։
«2025 թվականի մարտի 17-ին սոցցանցերում տեսանյութեր են տարածվել ադրբեջանական բանակին պատկանող զինտեխնիկայի տեղաշարժի մասին։ Հրապարակումները պնդում էին, որ, իբր, Ադրբեջանի պետական սահմանին ռազմական գործողություններ են իրականացվելու»,- ասվում է զեկույցում։
Դրա հետ կապված՝ Ադրբեջանի պետական անվտանգության ծառայությունը քրեական գործ է հարուցել։ Նախաքննության ընթացքում պարզվել է, որ տարածված տեսագրությունը թվագրված է 2025 թվականի փետրվարի 27-ով։
Նշվում է, որ 2007 թվականին ծնված Ադրբեջանի քաղաքացի Սամեդ Ռուստամովը նկարահանել է 2025 թվականի փետրվարի 27-ին Ադրբեջանի Հանրապետության զինված ուժերին պատկանող զինտեխնիկայի տեղաշարժը Գեդաբայի շրջանում և տեսանյութը տեղադրել TikTok սոցիալական ցանցի իր էջում 2025 թվականի մարտի 15-ին։ Այնուհետև սոցիալական ցանցերում տարածված տեսանյութին ավելացվել են տարբեր ժամանակաշրջանների կադրեր, ինչը հանգեցրել է ապատեղեկատվության:
Օպերատիվ գործողությունների արդյունքում Սամեդ Ռուստամովը ձերբակալվել է, որպես ապացույց՝ առգրավվել է բջջային հեռախոսը, որով նկարահանվել են տեսանյութերը։
Ադրբեջանի ՊԱԾ-ը նշում է, որ ադրբեջանական բանակի զորամասերի, դրանց տեղակայման, տեղաշարժերի, մարտական և մոբիլիզացիոն պատրաստականության, զենքի և զինտեխնիկայի վերաբերյալ համացանցային ռեսուրսներով, այդ թվում՝ սոցիալական ցանցերի միջոցով տեսանկարահանումն ու տարածումը քրեորեն պատժելի արարք է, այն կատարողների նկատմամբ համապատասխան միջոցներ են ձեռնարկվելու։
Թարգմանությունը՝ Էմմա Չոբանյանի
