Ադրբեջանի իշխանությունները հետախուզում են հայտարարել արտերկրում բնակվող Ալիևի քննադատ ադրբեջանցի բլոգերների նկատմամբ

Ադրբեջանի գլխավոր դատախազությունը քրեական գործեր է հարուցել երկրից արտագաղթած մի շարք քաղաքացիների նկատմամբ։ Նրանց թվում են Ադրբեջանի իշխանություններին, այդ թվում`նախագահ Իլհամ Ալիևին կոշտ քննադատող բլոգերներ, գործարարներ, համացանցային ալիքների ղեկավարներ, որոնք մեղադրվում են տարբեր հանցագործությունների մեջ։

Ըստ ադրբեջանական լրատվամիջոցների՝ Գլխավոր դատախազության քննչական վարչությունը պաշտոնական ծանուցումներ է ուղարկել մեղադրյալներին՝ Իլգար Հաջիևին, Մուհամմադ Միրզալիին, Գուրբան Մամեդովին, Էլշադ Մամեդովին, Գաբիլ Մամեդովին, Թուրալ Սադիգլիին՝ Ադրբեջանի Քրեական օրենսգրքի 467-13.4-րդ հոդվածի պահանջներին համապատասխան։

Ադրբեջանում ժամանակին բազմաթիվ մրցույթներ շահած «Ակորդ» ընկերության ղեկավար Իլգար Հաջիևը վերջին տարիներին բնակվում է ԱՄՆ-ում և հայտնի է Ադրբեջանի կառավարության հասցեին իր կոշտ քննադատությամբ։ Գլխավոր դատախազությունը հայտնել է, որ նա պետք է ներկայանա Քննչական վարչություն հուլիսի 14-ին։ Հաջիևին մեղադրանք է առաջադրվել Քրեական օրենսգրքի 178.3.2 հոդվածով (խարդախություն), նրա նկատմամբ հայտարարվել է հետախուզում, որպես խափանման միջոց է ընտրվել կալանավորումը։

Գլխավոր դատախազություն են հրավիրվել նաև բլոգերներ Մուհամմադ Միրզալին եւ Գաբիլ Մամեդովը։ Միրզալին Ֆրանսիայում հարձակման էր ենթարկվել, դանակահարության հետևանքով մի քանի վնասվածքներ ստացել։ Դեպքի առնչությամբ մի քանի մարդ էր ձերբակալվել։

Մեկ այլ բլոգեր՝ Գաբիլ Մամեդովը, որը հայտնի է իշխանությունների հասցեին կոշտ հայտարարություններով, հրավիրվել է Գլխավոր դատախազության քննչական վարչություն, նրան մեղադրանք է առաջադրվել Քրեական օրենսգրքի 24 հոդվածներով, այդ թվում՝ ահաբեկչություն։

Գլխավոր դատախազություն հրավիրվածներից է նաև փաստաբան և Azerifreedom հեռուստաալիքի ղեկավար Գուրբան Մամեդովը։ Նա մեղադրվում է ահաբեկչության և մի շարք այլ հանցագործությունների մեջ։ Մինչ Ադրբեջանից գաղթելը նա մի քանի անգամ ձերբակալվել է տարբեր մեղադրանքներով։ Իրավապաշտպանները նրան ճանաչել են որպես քաղբանտարկյալ։

Գլխավոր դատախազություն հրավիրել է նաև Թուրալ Սադիգլին՝ Azad Söz ալիքի ղեկավարը։ Նա մեղադրվում է զանգվածային անկարգություններ հրահրելու և այլ անօրինական գործունեության մեջ։

Սադիգլիի նկատմամբ հետախուզում է հայտարարվել, նա հեռակա կալանավորվել է։

Թարգմանությունը՝ Էմմա Չոբանյանի