Թուրքիան պատրաստվում է ընդլայնել ռազմական ներկայությունը Սիրիայում

Թուրքիան պատրաստվում է ընդլայնել իր ռազմական ներկայությունը Սիրիայում՝ այդ երկրի կառավարության և քրդական YPG-ի միջև անվտանգության համաձայնագրից հետո։ Այս մասին գրում է Turkiye today-ը՝ վկայակոչելով թուրքական անվտանգության աղբյուրներին։

Միաժամանակ, ըստ տեղեկությունների, ԱՄՆ-ն իր զորքերը դուրս է բերում տարածաշրջանից՝ Թուրքիայի ճնշման ներքո:

TGRT Haber-ի Անկարայի բյուրոյի ղեկավար Ֆաթիհ Աթիքը հայտնել է, որ թուրքական ուժերն ավելի մեծ դեր են ստանձնելու Սիրիայում Թուրքիայի և Սիրիայի միջև վերջին դիվանագիտական ​​շփումներից հետո։

«Ես խոսել եմ անվտանգության մի քանի աղբյուրների հետ։ Թուրքիայի վերջին դիվանագիտական ​​այցը վճռորոշ էր, համաձայնագրի շուրջ քննարկումները սեղանին էին։ Թուրքիան իր մտահոգությունն է հայտնել SDF-ի հետ գործարքի վերաբերյալ։ Առաջ շարժվելով՝ Թուրքիայի և Սիրիայի միջև ռազմական հարաբերությունները կաճեն»,- հայտարարել է Աթիքը։

Նա նաև նշել է, որ Թուրքիան ներկայում վերահսկում է զգալի տարածքներ Սիրիայի հյուսիսում, և որ քննարկվում են ռազմաբազաների պլանները։

«Սկզբում նշվում էր երեք ռազմակայան, սակայն դրանց թիվը կարող է փոխվել։ Դրանք կարող են ստեղծվել Հալեպում կամ ավելի հարավ: Ավելի շատ թուրքական զորքեր կակտիվանան Սիրիայում»,- ասել է նա։

Սիրիայի ղեկավարությունն ավելի վաղ հայտնել էր, որ պայմանավորվածություն է ձեռք բերվել, որ SDF-ի ուժերը կինտեգրվեն սիրիական բանակին:

Ըստ Աթիկի՝ ԱՄՆ-ը դուրս է գալիս տարածաշրջանից՝ Թուրքիայի աճող ազդեցության և դիվանագիտական ​​ճնշման պատճառով։

«ԱՄՆ-ը լքում է տարածաշրջանը Թուրքիայի ճնշման պատճառով։ Թուրքական ուժերը Սիրիայում ավելի շատ պատասխանատվություն կստանձնեն»,- ասել է նա՝ հավելելով, որ ԱՄՆ-ը վճռորոշ դեր է խաղացել SDF-ի հետ համաձայնագրի ստորագրման հարցում։

Թարգմանությունը՝ Էմմա Չոբանյանի