13.01.2026 | 19:11
Իրանի պաշտոնյաների հետ հանդիպումները չեղարկել եմ, օգնությունը ճանապարհին է. Թրամփը դիմել է իրանցիներին
Պուտինի խոսքերը հերթական մանիպուլյացիան են, նա ցանկանում է շարունակել պատերազմը․ Զելենսկի
Քաղաքականություն
14.03.2025 | 11:38
ՌԴ նախագահ Վլադիմիր Պուտինի՝ 30-օրյա հրադադարի առաջարկի մասին հայտարարությունները «շատ կանխատեսելի» են և «շատ մանիպուլյատիվ»։ Այս մասին հայտարարել է Ուկրաինայի նախագահ Վլադիմիր Զելենսկին։
«Բոլորս Ռուսաստանից լսեցինք շատ կանխատեսելի, շատ մանիպուլյատիվ խոսքեր՝ ի պատասխան ճակատում հրադադարի գաղափարին. նա, ըստ էության, պատրաստվում է մերժել։ Պուտինը, իհարկե, վախենում է ուղիղ ասել Թրամփին, որ ցանկանում է շարունակել պատերազմը, ցանկանում է շարունակել սպանել ուկրաինացիներին»,- ասել է Զելենսկին՝ նշելով, որ «այդ պատճառով Մոսկվայում հրադադարի գաղափարը շրջապատում են այնպիսի նախապայմաններով, որ ընդհանրապես ոչինչ չստացվի, կամ ինչքան հնարավոր է՝ երկար ոչինչ չստացվի։
Ըստ նրա՝ «Պուտինը հաճախ է դա անում. նա ուղղակիորեն «ոչ» չի ասում, բայց դա անում է այնպես, որ ձգձգում է գրեթե ամեն ինչ և անհնար է դարձնում նորմալ որոշումները»:
Զելենսկին ասել է, որ Ուկրաինայում «այժմ այս ամենը համարում են հերթական ռուսական մանիպուլյացիա»։ Նա նշել է, որ ԱՄՆ-ը պատրաստ է եղել կազմակերպել հրադադարի ռեժիմի պահպանման վերահսկողություն։ Պուտինն ասել է, որ դրանք այն հարցերն են, որոնք պետք է քննարկվեն նախքան հրադադարի համաձայնության հասնելը։ Ըստ Ուկրաինայի նախագահի՝ նման վերահսկողությունը կարող է իրատեսորեն ապահովվել «ամերիկյան և եվրոպական հնարավորություններով»։
«Մենք պայմաններ չենք դնում, որոնք ինչ-որ բան բարդացնում են: Սա այն է, ինչ անում է Ռուսաստանը։ Ինչպես միշտ ասել ենք՝ միակը, որը կձգձգի, միակը, որը կլինի ոչ կառուցողական, Ռուսաստանն է։ Նրանց պատերազմ է պետք»,- հավելել է Զելենսկին՝ կոչ անելով ճնշել Պուտինին։
Հիշեցնենք, որ Պուտինը նախօրեին հայտարարել էր, որ ՌԴ-ն համաձայն է հրադադարի ԱՄՆ-ի առաջարկին, սակայն նրբություններ կան։
Թարգմանությունը՝ Էմմա Չոբանյանի
