Էրդողանը ողջունել է Սիրիայի իշխանությունների և Անկարայի կողմից ահաբեկչական համարվող քրդական ուժերի համաձայնությունը

Թուրքիայի նախագահ Ռեջեփ Թայիփ Էրդողանը ողջունել է քրդերի գլխավորած, ԱՄՆ-ի աջակցությամբ գործող «Սիրիայի դեմոկրատական ​​ուժերի» (SDF) և Սիրիայի նոր կառավարության միջև համաձայնագիրը՝ ասելով, որ դրա ամբողջական իրականացումը կնպաստի երկրում անվտանգությանն ու կայունությանը, գրում է Duvar-ը։

SDF-ը, որը վերահսկում է Սիրիայի հյուսիս-արևելքի մեծ մասը, և որին Անկարան համարում է ահաբեկչական կազմակերպություն՝ Թուրքիայի քուրդ զինյալների հետ կապերի պատճառով, համաձայնագիր էր ստորագրել՝ միանալու Սիրիայի նոր պետական ​​կառույցներին։

«Սիրիայում նախօրեին ձեռք բերված համաձայնագրի լիարժեք կատարումը կնպաստի երկրի անվտանգությանն ու կայունությանը։ Դրա շահառուները կլինեն մեր բոլոր սիրիացի եղբայրներն ու քույրերը։ Մենք մեծ նշանակություն ենք տալիս մեր հարևան Սիրիայի տարածքային ամբողջականությանը, նրա միասնական կառուցվածքի պահպանմանը, նրա միասնության ու կայունության ամրապնդմանը»,- ասել է Էրդողանը։

Ավելի վաղ թուրք պաշտոնյան ասել էր, որ Անկարան «զգուշորեն լավատեսորեն» է տրամադրված գործարքի վերաբերյալ, սակայն կենտրոնացել է դրա իրականացման վրա:

«SDF-ը նախկինում խոստումներ է տվել, ուստի մենք դիտարկում ենք իրականացմանը, այլ ոչ թե մտադրության արտահայտմանը»,- Reuters-ին ասել էր պաշտոնյան:

SDF-ի և Դամասկոսի միջև համաձայնագիրը ուշագրավ է նաև ֆոնին, որ PKK-ի այս ամսվա սկզբին հայտարարել էր, որ կդադարեցնի ռազմական գործողությունները թուրքական պետության դեմ՝ բանտարկված առաջնորդ Աբդուլահ Օջալանի զինաթափման կոչից հետո:

Հիշեցնենք, որ Սիրիայի նախագահը ավելի վաղ հայտարարել էր երկրի պետական ​​կառուցվածքում քրդական ուժերի ինտեգրման բեկումնային համաձայնագրի մասին։

Թարգմանությունը՝ Էմմա Չոբանյանի