Քաղաքականություն
04.03.2025 | 11:33
Բաքուն արձագանքել է ՄԱԿ-ի Մարդու իրավունքների գերագույն հանձնակատար Վոլկեր Տյուրկի՝ ադրբեջանական բանտերում պահվող հայերին անհապաղ ազատ արձակելու կոչին։
«Խաղաղություն հաստատելու ջանքերի ճանաչումը չպետք է մթագնի ամբողջական պատկերը։ Արդարության հասնելու համար անհրաժեշտ է պատասխանատվության ենթարկել բոլոր նրանց, որոնք մեղադրվում կամ դատապարտվում են ռազմական հանցագործությունների, էթնիկ զտումների, ռազմական ագրեսիայի, խոշտանգումների և այլ ծանր հանցագործությունների համար»,- հայտարարել է Ադրբեջանի ԱԳՆ մամուլի խոսնակ Այխան Հաջիզադեն։
Նա նշել է, թե, իբր, «ճշմարտության ապահովումը, արդարադատության ապահովումը զոհերի համար և օրենքի գերակայության պահպանումը պահանջում են արդար դատավարություն՝ միջազգային իրավական չափանիշներին համապատասխան»։
«Միայն ճշմարտության բացահայտումը և հանցագործությունների հետևանքների վերացումը թույլ կտան, որ խաղաղությունն ու հաշտությունը հաղթեն անպատժելիությանը»,- նշել է Հաջիզադեն։
Հիշեցնենք, որ ՄԱԿ-ի Մարդու իրավունքների հանձնակատարը հայտարարել էր, որ «Ադրբեջանում կամայականորեն ձերբակալված բոլոր անձինք, ներառյալ՝ էթնիկ հայերը, պետք է անհապաղ ազատ արձակվեն և արդար դատավարության իրավունքը պետք է լիարժեք հարգվի»։
Թարգմանությունը՝ Էմմա Չոբանյանի
