22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Ադրբեջանի դրոշով երթևեկող վարորդի նկատմամբ անընթեռնելի համարանիշով մեքենա վարելու արձանագրություն է կազմվել
Հասարակություն
03.03.2025 | 21:37
Այսօր Ադրբեջանի դրոշով երթևեկող քաղաքացու նկատմամբ վարչական իրավախախտման արձանագրություն է կազմվել: Այս մասին Factor TV-ին հայտնում են ՆԳՆ ոստիկանության լրատվական ծառայությունից:
Մեր հարցին, թե ինչ հոդվածով է կազմվել արձանագրությունը, Ոստիկանությունից հրաժարվեցին պատասխանել: Այնուամենայնիվ, մեզ հայտնի է դարձել, որ արձանագրությունը կազմվել է Վարչական իրավախախտումների վերաբերյալ օրենսգրքի 123.5 հոդվածով, այսինքն՝ տրանսպորտային միջոցների հաշվառման համարանիշի օգտագործման կանոնները խախտելը: Տվյալ դեպքում վարորդին վերագրվող իրավախախտումը անընթեռնելի հաշվառման համարանիշով մեքենա վարելն է:
Թե ինչ հանգամանքներում և ինչ նպատակով էր դրոշը հայտնվել քաղաքացու մոտ, մեզ հայտնի չէ. Ոստիկանությունը դեպքի վերաբերյալ լրացուցիչ տեղեկություններ չի տրամադրում, սակայն փաստ է, որ նրա նկատմամբ կազմվել է բացառապես անընթեռնելի համարանիշով տրանսպորտային միջոց վարելու վերաբերյալ արձանագրություն:
Հիշեցնենք, որ այսօր համացանցում տարածվել էր մի տեսանյութ, որում Արտաշատ տանող ճանապարհով ընթանող մեքենայից ծածանվում է Ադրբեջանի դրոշը: Այս տեսանյութի տարածվելուց հետո հայտնի դարձավ, որ մեքենայի վարորդը, որն ազգությամբ հայ է և ՀՀ քաղաքացի, Ոստիկանությունում է:
Արաքս Մամուլյան
