08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Ուկրաինայի Ռադան 2-րդ փորձից ընդունել է Զելենսկիի լեգիտիմությունը հաստատող և պատերազմից հետո ընտրություններ անցկացնելու մասին բանաձևը
Քաղաքականություն
25.02.2025 | 15:45
Ուկրաինայի Գերագույն Ռադան 268 ձայնով հավանություն է տվել երկրում ժողովրդավարության մասին բանաձևին՝ ռուսական ագրեսիայի համատեքստում։ Փաստաթուղթը հաստատում է նախագահ Վլադիմիր Զելենսկիի լեգիտիմությունը և ընտրությունների անհնարինությունը մինչև խաղաղության հաստատումը։
«Երկրորդ փորձով այսօր մենք վերջապես քվեարկեցինք ժողովրդավարության [և Զելենսկիի ու ապագա ընտրությունների աջակցության] մասին թիվ 13041 բանաձևի օգտին։ Սա այն է, որը երեկ ձախողվել էր։ Կողմ՝ 268»,- գրել է Ռադայի պատգամավոր Յարոսլավ Ժելեզնյակը։
Բանաձևի իրավաբանական անվանումն է՝ «Ուկրաինայի Գերագույն Ռադայի հայտարարությունը ռուսական ագրեսիայի համատեքստում Ուկրաինայում ժողովրդավարությանն աջակցելու մասին»։ Դրանում նշվում է, որ հենց ՌԴ նախագահ Վլադիմիր Պուտինն է պատասխանատու այն բանի համար, որ ներկայում անհնար է Ուկրաինայում կազմակերպել ազատ, թափանցիկ և ժողովրդավարական ընտրություններ միջազգային դիտորդների հրավիրելով, որոնք այդպիսին կճանաչվեն միջազգային հանրության կողմից։
Խորհրդարանը նշում է, որ երկրում ՌԴ լայնամասշտաբ ներխուժման համատեքստում մտցված ռազմական դրությունը թույլ չի տալիս ընտրություններ անցկացնել Ուկրաինայի Սահմանադրությանը համապատասխան։ Միաժամանակ, ուկրաինացի ժողովուրդը համախմբված է այն համոզմունքի հարցում, որ նման ընտրություններ պետք է տեղի ունենան պատերազմի ավարտից հետո։ Ռադան ուկրաինացի ժողովրդի անունից հայտարարում է, որ Ուկրաինան՝ որպես ժողովրդավարական երկիր, երբ իր տարածքում ապահովի համապարփակ, արդար և կայուն խաղաղություն, խորհրդարանի որոշմամբ, կհայտարարի նախագահի ընտրությունների անցկացման մասին։
Խորհրդարանը ևս մեկ անգամ հիշեցնում է, որ Ուկրաինայի նախագահ Վլադիմիր Զելենսկին ընտրվել է ազատ, թափանցիկ, ժողովրդավարական ընտրություններով։ Նրա մանդատը կասկածի տակ չի դնում ուկրաինացի ժողովուրդը և Գերագույն Ռադան։
Այն նաև կոչ է անում միջազգային հանրությանը միավորել ջանքերը՝ ընդհանուր հաղթանակի հասնելու, Ուկրաինայի դեմ Ռուսաստանի զինված ագրեսիան դադարեցնելու և Ուկրաինայի համար համապարփակ, արդար և կայուն խաղաղություն հաստատելու համար։
Թարգմանությունը՝ Էմմա Չոբանյանի
