ԲԴԽ-ն չի կատարել ՍԴ-ի որոշումը. Դավիթ Հարությունյանը երկրորդ գանգատն է ուղարկել ՄԻԵԴ

Դատավոր Դավիթ Հարությունյանը, որի լիազորությունները մեկուկես տարի առաջ Բարձրագույն դատական խորհուրդը դադարեցրել է, երկրորդ գանգատն է ներկայացրել Մարդու իրավունքների եվրոպական դատարան: Այս մասին հայտնում է նրա ներկայացուցիչ, փաստաբան Զորայր Հարությունյանը:

«Հաշվի առնելով հանրային հետաքրքրության բարձր աստիճանը՝ տեղեկացնում եմ, որ դատավոր Դավիթ Հարությունյանի կարգապահական վարույթով ՀՀ ԲԴԽ կողմից կայացված չվերանայելու մասին որոշման կապակցությամբ ՄԻԵԴ է ներկայացվել հերթական գանգատը:

Գանգատով շարադրված փաստակազմով հիմնավորվել է Դատավոր Դավիթ Հարությունյանի` դատարանի մատչելիության, արդարացի և հրապարակային դատաքննության, անկախ ու անաչառ դատարանի կողմից գործի քննության և իրավական պաշտպանության արդյունավետ միջոցի իրավունքների խախտումները (երաշխավորված համապատասխանաբար` ՄԻԵԿ 6-րդ և 13-րդ հոդվածներով):

Հետագա զարգացումների վերաբերյալ կտրամադրվի լրացուցիչ տեղեկատվություն»,- Facebook-ի իր էջում գրել է Զորայր Հարությունյանը:

Հիշեցնենք, որ Դավիթ Հարությունյանի լիազորությունները ԲԴԽ-ի կողմից դադարեցնելու որոշումից հետո դատավորը դիմել էր Սահմանադրական դատարան, որն արձանագրել էր Հարությունյանի իրավունքների խախտման փաստը:

Այս որոշումից հետո Դավիթ Հարությունյանը դիմել էր ԲԴԽ-ին՝ իր գործը վերանայելու պահանջով, սակայն ԲԴԽ-ն որոշում էր կայացրել գործը չվերանայելու մասին՝ ըստ էության չկատարելով ՍԴ-ի որոշումը, և այժմ, ՄԻԵԴ ներկայացված գանգատով դատավորը հենց այս հանգամանքն է վիճարկում:

Դատավորի լիազորությունները դադարեցվել էին 2023 թվականի հուլիսի 3-ին՝ լրատվամիջոցներին տված հարցազրույցի համար։ ԲԴԽ-ն նիստը դռնփակ էր անցկացրել՝ պնդելով, թե դա բխում է արդարադատության շահից։ Բացի այդ՝ նիստի ընթացքում Խորհուրդը որոշել էր Հարությունյանին հեռացնել նիստերի դահլիճից, և սա այն դեպքում, երբ դատավորը դեռևս չէր հասցրել իր կարգապահական գործի վերաբերյալ դիրքորոշում հայտնել՝ չնայած բազմիցս պնդել էր, որ դիրքորոշում ներկայացնելու է։ Այն պահին, երբ դատավորին հեռացրել են նիստերի դահլիճից, այնտեղ ներկա չեն եղել նաև դատավորի փաստաբանները։

ԲԴԽ որոշումից հետո էր Հարությունյանը դիմել Սահմանադրական դատարան, և դատարանը 2024-ի մայիսի 21-ին որոշում էր կայացրել, որ այս գործով հրապարակայնության սկզբունքին, դատական սանկցիա կիրառելուն վերաբերող նորմերը ԲԴԽ-ն Հարությունյանի նկատմամբ այլ մեկնաբանությամբ է կիրառել, ուստի գործը ենթակա է վերանայման:

Արաքս Մամուլյան