Ադրբեջանում ևս երկու լրագրող է կալանավորվել

Ադրբեջանում ևս երկու լրագրող է կալանավորվել երկրում անկախ ու ընդդիմադիր լրատվամիջոցների, գործիչների նկատմամբ շարունակվող բռնաճնշումների քաղաքականություն շրջանակներում։ Տեղական լրատվամիջոցների հաղորդմամբ՝ Argument.az կայքի խմբագիր և Meydan TV-ի աշխատակից Շամշադ Աղան Meydan TV-ի գործով մեղավոր է ճանաչվել մաքսանենգության մեջ և նրա նկատմամբ որպես խափանման միջոց է ընտրվել 2 ամիս 1 օր կալանքը։ Այս որոշումը փետրվարի 6-ին կայացրել է Բաքվի Խաթայի շրջանային դատարանը։

Փաստաբան Շահլա Գումբատովան հայտնել է, որ դատարանը բավարարել է քննչական մարմնի՝ Բաքվի ոստիկանության գլխավոր վարչության միջնորդությունը։

«Մենք հետաքննությունից պահանջել ենք ներկայացնել լրագրողի՝ մաքսանենգության մեջ ներգրավվածությունը հաստատող նախնական ապացույցներ։ Սակայն պարզվեց, որ դատարան ընդհանրապես ապացույցներ չեն ներկայացվել»,- նշել է փաստաբանը։

Դատավարության ընթացքում լրագրողն իրեն մեղավոր չի ճանաչել՝ մեղադրանքն անվանելով զրպարտություն, հերքել է իր կողմից ցանկացած հանցավոր գործունեություն։

Միաժամանակ, դատարանը որոշում է կայացրել հայտնի լրագրող Շահնազ Բեյլերքըզիի (Հուսեյնովա) վերաբերյալ։ Գործը քննվել է Խաթայի դատարանում։ Լրագրողի նկատմամբ խափանման միջոց է ընտրվել կալանավորումը՝ 3 ամիս 15 օր ժամկետով։

Փաստաբան Բախտիյար Հաջիևի խոսքով՝ լրագրողին մեղադրանք է առաջադրվել Քրեական օրենսգրքի 162-1.1 (աշխատողներին ներգրավել որևէ աշխատանք կատարելու մեջ՝ առանց օրինական ուժի մեջ մտած աշխատանքային պայմանագիր կնքելու), 192.3.2 (ապօրինի ձեռնարկատիրություն), 193-1.3.1 (գույքի օրինականացում անօրինական ճանապարհով ձեռք բերված),206.4 (մաքսանենգություն, որը կատարվել է կազմակերպված խմբի կողմից) և 213.2.1 (կազմակերպված խմբի կողմից հարկերից խուսափելը) հոդվածներով։ Մեղադրանքները հաստատվելու դեպքում լրագրողին կարող է սպառնալ մինչև 12 տարի ժամկետով ազատազրկում։

Նա մի քանի տարի աշխատել է որպես հաղորդավարուհի Toplum TV-ում։ Այն բանից հետո, երբ 2024 թվականի մարտին լրատվամիջոցի դեմ քրեական գործ է հարուցվել և նրա աշխատակիցները ձերբակալվել են, Բեյլարքըզին մի քանի անգամ հարցաքննվել է։

Հավելենք, որ ըստ տեղական իրավապաշտպան կազմակերպությունների պատրաստած ցուցակների՝ ներկայում ադրբեջանական բանտերում ավելի քան 300 քաղբանտարկյալ կա։

Թարգմանությունը՝ Էմմա Չոբանյանի