03.04.2026 | 16:17
ՀԸՖ․ Արթուր Ալեքսանյանը գորգում իր վերջնական խոսքը դեռ չի ասել
Ծեծկռտուք` Քաջարանի պոչամբար թաղամասում. կան բերման ենթարկվածներ
Հասարակություն
05.02.2025 | 22:13
Քաջարանի պոչամբար թաղամասում ծեծկռտուք է տեղի ունեցել, որի հետևանքով կան բերման ենթարկվածներ։ Այս մասին հայտնել է ՆԳՆ մամուլի քարտուղար Նարեկ Սարգսյանը։
«Տեղեկություններ են ստացվել, որ Քաջարանի պոչամբար թաղամասում ծեծկռտուք է եղել։ Անմիջապես միջոցառումներ են ձեռնարկվել։
Դեպքի վայր են գնացել ոստիկաններ, կանխվել են հետագա զարգացումները։ Այս պահի դրությամբ կա 8 բերման ենթարկված»,- ասել է Սարգսյանը։
Հիշեցնենք, որ արդեն 6-րդ օրն է՝ ԶՊՄԿ-ի հարյուրավոր աշխատակիցներ գործադուլ են անում՝ պահանջելով աշխատավարձի բարձրացում 120-ից 150 հազար դրամի չափով։ Կառույցի ղեկավարությունը, սակայն, պահանջն անիրատեսական է համարում։ Արդյոք այս միջադեպը կապ ունի ԶՊՄԿ աշխատակիցների հետ, փորձեցինք պարզել ոստիկանությունից, սակայն դեռ չհաջողվեց։ ԶՊՄԿ-ի գործադուլ անող աշխատողներից մեկը, սակայն, Factor.am-ին տեղեկացրեց, որ տեղի ունեցածը ԶՊՄԿ-ի ու գործադուլի հետ կապ չունի:
«Քաղաքի մյուս ծայրում ա եղել: Մեծ քաղաք ա, ամեն ինչ էլ կարա լինի, թող դա ԶՊՄԿ-ին չվերագրեն, – նշեց նա:
Ավելի ուշ ԶՊՄԿ-ն պարզաբանում տարածեց՝ նշելով, որ ընկերության տարածքում հրազենի կիրառմամբ որևէ միջադեպ տեղի չի ունեցել։
«Հայտնում ենք, որ Զանգեզուրի պղնձամոլիբդենային կոմբինատ ՓԲ ընկերության տարածքում հրազենի կիրառմամբ որևէ միջադեպ տեղի չի ունեցել։
Ոստիկանության հայտնած տեղեկատվությունը՝ ԶՊՄԿ տարածքից դուրս տեղի ունեցած միջադեպի վերաբերյալ, ընկերությունը մեկնաբանել չի կարող»,- ասված է պարզաբանման մեջ։
