Եթե կարողանանք մեր իսկական դեմքը տեսնել, գուցե սարսափենք. ապաքաղաքական զրույց Գուրգեն Խանջյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է արձակագիր, դրամատուրգ, թարգմանիչ Գուրգեն Խանջյանը: Նրա կարծիքով՝ ցանկացած արժեքավոր գրական ստեղծագործություն ինքնակենսագրական է․ հեղինակը, ի վերջո, գրում է իր մասին:

Խանջյանի մի շարք գործերում գլխավոր հերոսները գրողներ են, և պարզ է, որ նրանց կարելի է նույնականացնել հեղինակի հետ: Բայց, ըստ գրողի, հազվադեպ չի պատահում, որ նույնիսկ այդ հերոսները սկսում են ապրել իրենց սեփական կյանքով:

Գրողի ստեղծագործության կարևոր թեմաներից է երևակայականի և իրականի փոխհարաբերությունը, իրականը բացահայտելու մարդկանց ճիգերը: Վեպերից մեկում հայելին գլխավոր հերոսին ասում է՝ «իրական դեմք» գոյություն չունի: Մեկնաբանելով այդ արտահայտությունը՝ հաղորդման հյուրը նշում է, որ դեմքն այն է, ինչով մենք ներկայանում ենք հասարակությանը, դեմքի վրա մենք աշխատում ենք ամբողջ կյանքի ընթացքում: Բայց եթե կարողանանք մեր իսկական դեմքը տեսնել, ապա, գուցե, սարսափենք կամ, հակառակը, խղճահարվենք:

Ինչպիսի ձգտումներ ունի 75-ամյա գրողը և ինչով են դրանք տարբերվում երիտասարդ գրողի ձգտումներից: Ըստ Խանջյանի՝ երբ երիտասարդը մտնում է գրականություն, սովորաբար նրա նպատակն է լինում հեղափոխություն իրականացնել գրականության մեջ, շուռ տալ գործող կանոնները: Տարիքի հետ մարդիկ դառնում են ավելի պահպանողական, և հատկապես այսօրվա Հայաստանի համար կարևոր է անցյալից վերցնել արժեքավոր ժառանգությունը՝ դեպի ապագա գնալու համար:

Մանրամասները՝ տեսանյութում:

Արամ Աբրահամյան