Ադամյանը փոխել է ակումբային գրանցումը, Տոտենհեմի նոր դարպասապահը, Գաբիգոլը նոր ակումբ ունի․ Տրանսֆերային անցուդարձ

Ձմեռային տրանսֆերային պատուհանն արդեն մի քանի օր է, ինչ բացվել է։ Առաջարկում ենք ծանոթանալ արդեն կայացած մի շարք կարևոր տրանսֆերներին. գրում է armsport-ը։

✅ Հայաստանի ազգային հավաքականի ֆուտբոլիստ Սարգիս Ադամյանը վերադարձել է գերմանական «Յան Ռեգենսբուրգ» ակումբ, որտեղ հանդես է եկել 2017-19 թվականներին: Ադամյանը «Քյոլնից» վարձավճարով է տեղափոխվել իր նախկին ակումբ: Նրա պայմանագիրը գերմանական երկրորդ Բունդեսլիգայում հանդես եկող «Յան Ռեգենսբուրգի» հետ նախատեսված կլինի մինչև այս տարվա հունիսի 30-ը:

✅ Բրազիլիայի հավաքականի նախկին հարձակվող Գաբրիել Բարբոսան, ով ավելի շատ հայտնի է որպես Գաբիգոլ, «Ֆլամենգոյից» տեղափոխվել է «Կրուզեյրո»։ Նա նոր ակումբի հետ պայմանագիր է կնքել մինչև 2028 թվականը։ 28-ամյա ֆուտբոլիստը «Կրուզեյրոյին» միացել է ազատ գործակալի կարգավիճակով։

✅ «Լիոնի» նիգերիացի հարձակվող Գիֆտ Օրբանը տեղափոխվել է «Հոֆենհայմ»։ Ըստ Transfermarkt-ի՝ 22-ամյա ֆոտբոլիստի տրանսֆերի դիմաց գերմանական ակումբը վճարել է 9 մլն եվրո։ «Գենտի» կազմում Օրբանը դարձել էր ՈւԵՖԱ-ի ակումբային մրցաշարերի պատմության ամենաարագ հեթ-տրիկի հեղինակը։ 2023 թվականի նիգերիացին Կոնֆերենցիաների լիգայի 1/8 եզրափակչի հանդիպմանը գոլերի հեղինակ է դարձել 31-րդ, 32-րդ և 34-րդ րոպեներին։ Հեթ-տրիկի հեղինակ դառնալու համար նրանից պահանջվել է 3 րոպե 25 վայրկյան, ինչը եվրագավաթային բոլոր մրցաշարերի ռեկորդ է։

✅ Լևերկուզենի «Բայերը» համալրել է կազմը՝ պայմանագիր կնքելով 18-ամյա արգենտինացի ֆուտբոլիստի հետ։ Լևերկուզենյան ակումբը հայտարարել է Ալեխո Սարկոյի տրանսֆերի մասին «Վելես Սարսֆիլդից»։ Կողմերը պայմանագիր են կնքել մինչև 2029 թվականի հունիսը։ Նա գերմանական ակումբ է տեղափոխվել ազատ գործակալի կարգավիճակով։

✅ Չեխ դարպասապահ Անտոնին Կինսկին տեղափոխվել է «Տոտենհեմ»: Լոնդոնյան ակումբը հայտարարել է դարպասապահի հետ մինչև 2031 թվականը պայմանագիր կնքելու մասին։ 21-ամյա ֆուտբոլիստը, որը նախկինում հանդես է եկել Պրահայի «Սլավիայում», Չեխիայի հավաքականի և ռուսական «Սատուրն» ակումբի նախկին դարպասապահ Անտոնին Կինսկիի որդին է։ Ըստ բրիտանական լրատվամիջոցների՝ տրանսֆերի գումարը կազմել է 12,5 մլն ֆունտ ստեռլինգ՝ գումարած բոնուսները։

✅ Կոտ դ’Իվուարի հավաքականի կենտրոնական կիսապաշտպան Սեկո Ֆոֆանան համալրել է «Ռենի» կազմը։ Նշվում է, որ 29-ամյա ֆուտբոլիստի հետ պայմանագիրը նախատեսված է 4,5 տարով։ «Ալ Նասրի» ֆուտբոլիստի տրանսֆերի գումարը, ըստ Transfermarkt-ի, կազմել է 20 մլն եվրո։

✅ «Լիոնի» պորտուգալացի 34-ամյա դարպասապահ Անտոնի Լոպեսն ազատ գործակալի կարգավիճակով տեղափոխվել է «Նանտ»։