ՌԴ-ի հետ քննարկում կա զենքի համար տրված գումարը այլ պարտքի վճարմանը փոխանցելու. նախարարը մանրամասնեց․ ՏԵՍԱՆՅՈՒԹ

«ՀՀ-ն և ՌԴ-ն ունեն որոշակի երկխոսություն առկա պարտքը հաշվանցելու, երկկողմանի պարտավորություններ կան, որոնք առաջացել են այս կամ այն փուլում, այդ պարտավորությունները միմյանց հետ հաշվանցելու մասին քննարկում գոյություն ունի»,- այս մասին ասաց ՀՀ Ֆինանսների նախարար Վահե Հովհաննիսյանը՝ Factor TV-ի հարցին ի պատասխան՝ արդյո՞ք քննարկվում է ՌԴ-ին զենքերի համար տրված գումարը ուղղել ՀՀ-ի ունեցած այլ պարտքի մարմանը։

ՌԴ-ից զենք ձեռք բերելու համար փոխանցված գումարի չափը պաշտոնապես չի բացահայտվում։ Մինչ այս շրջանառվել են տեղեկություններ 200-ից մինչև 400 մլն դոլարի փոխանցման մասին։

Այսօր նախարարը չասաց, թե ՌԴ-ի հանդեպ ունեցած ո՞ր պարտքի մարմանը կարող է այն ուղղվել, անգամ՝ ոլորտը չբացահայտեց։

Այն, որ Ռուսաստանը ՀՀ-ին ստացված գումարի դիմաց սպառազինություն չի մատակարարել 44-օրյա պատերազմից հետո առաջին անգամ բարձրաձայնեց Նիկոլ Փաշինյանը։ Վարչապետը թեև կոնկրետ երկրի անուն չէր տվել, բայց 2022 թվականի սեպտեմբերի 29-ին՝ հրապարակավ դժգոհել էր դաշնակից համարվող երկրներից։

Ֆինանսների նախարարությունից 2023 թվականի դեկտեմբերին Factor TV-ի գրավոր հարցմանն ի պատասխան հայտնեցին, որ Հայաստանը Ռուսաստանին այդ պահի դրությամբ պարտք է 280 մլն դոլար, որը համարժեք է 112 մլրդ դրամի։ Պարտքը գոյացել է ՌԴ-ից վերցված երեք վարկերից։ ՀՀ-ն 2015 թվականին ՌԴ-ից 270 մլն դոլարի վարկ է ստացել ատոմակայանի վերականգման ծրագրի համար, որի մնացորդը պատասխանի տրամադրման պահին կազմում էր 102 մլն դրամ։ Նույն թվականին ՌԴ-ից ևս մեկ՝ 200 մլն դոլարանոց վարկ է վերցրել՝ զենքեր ձեռք բերելու համար։ Այս վարկի մնացորդը մեկ տարի առաջ այս օրերին փոխանցված պատասխանի համաձայն 80 մլն դոլար է։ Նույն նպատակով ՌԴ-ն 100 մլն դոլարի վարկ էլ տվել է 2017-ին, մնացորդն կրկին նախորդ տարվա տվյալներով 97 մլն դոլար է։ Ուշագրավ է, որ ՌԴ-ն վարկերը տրամադրել է հենց իրենից զենքեր գնելու նպատակով։

Մանրամասները՝ տեսանյութում։

Նարեկ Կիրակոսյան