Քաղաքականություն
12.12.2024 | 15:47
ԱՄՆ Պաշտպանության նախարարության փոխխոսնակ Սաբրինա Սինգհը ճեպազրույցում անդրադարձել է Սիրիայում տիրող իրավիճակին՝ հաստատելով, որ Վաշինգտոնը շարունակում է համագործակցությունը Սիրիայում քրդական ուժերի՝ SDF-ի հետ։
«SDF-ի հետ մեր գործընկերության մեջ որևէ փոփոխություն չի եղել, երբ խոսքը վերաբերում է ԻԼԻՊ-ի պարտությունն ապահովելուն: Տեսաք, որ հանգստյան օրերին Կենտրոնական հրամանատարությունը հարվածներ էր հասցնում ԻԼԻՊ-ի ճամբարներին և առաջնորդներին Բադիյա անապատում: SDF-ի ուժերի հետ մեր աշխատանքի կամ գործընկերության մեջ որևէ փոփոխություն չկա: Մեր հրամանատար, գեներալ Կուրիլլան տարածաշրջանում էր՝ շփվելով իր գործընկերների հետ»,- ասել է Սինգհը՝ պատասխանելով քրդական ուժերի հետ ԱՄՆ-ի գործընկերության մասին հարցին։
Ավելի վաղ էլ հաղորդվել էր, որ ԱՄՆ-ի կողմից աջակցվող սիրիական քրդական ուժերը (SDF) և Թուրքիայի կողմից աջակցվող սիրիական խմբավորումը ԱՄՆ-ի միջնորդությամբ հյուսիսային Մանբիջ քաղաքում հրադադարի համաձայնություն են ձեռք բերել՝ «ապահովելու խաղաղ բնակիչների անվտանգությունը»։
Թարգմանությունը՝ Էմմա Չոբանյանի
