Էրդողանի ելույթը խափանելու համար կալանավորված ակտիվիստները հայցեր են ներկայացրել բանտում դաժան վերաբերմունքի հետ կապված

Պաղեստինամետ ինը ակտիվիստներ, որոնք վերջերս մի քանի օրով կալանավորվել էին Իսրայելի հետ Անկարայի ենթադրյալ առևտրի առնչությամբ Թուրքիայի նախագահ Ռեջեփ Թայիփ Էրդողանի ելույթի ժամանակ բողոքելու համար, հայցեր են ներկայացրել համապատասխան մարմինների դեմ՝ պնդելով, որ կալանավորման ընթացքում ենթարկվել են դաժան վերաբերմունքի, այդ թվում՝ մերկապարանոց խուզարկությունների, գրում է Turkish Minute-ը։

Ակտիվիստները, որոնք նոյեմբերի 29-ին ընդհատել էին Էրդողանի ելույթը Ստամբուլում TRT Համաշխարհային ֆորումի ժամանակ՝ նախագահին մեղադրելով կեղծավորության մեջ, ձերբակալվել, ապա կալանավորվել էին դատարանի կողմից։ Նրանք ազատ են արձակվել դեկտեմբերի 6-ին այն բանից հետո, երբ նրանց փաստաբանները բողոք են ներկայացրել՝ վիճարկելով ձերբակալությունները: Նրանց մեղադրանք էր առաջադրվել «նախագահին վիրավորելու» և ապօրինի ցույցի մասնակցելու համար։

Ինը ցուցարարները, որոնցից 7-ը կանայք են, իրենց միջնորդության մեջ նախագահի թիկնապահներին, Ստամբուլի ոստիկանական բաժանմունքի տնօրենին և ոստիկաններին, բանտի աշխատակիցներին մեղադրել են «խոշտանգումների, դիտավորյալ վնասվածքներ հասցնելու, սեռական ոտնձգությունների, վիրավորանքի, սպառնալիքի, պաշտոնական դիրքի չարշահումների» համար։

Միջնորդության մեջ մեղադրվում է նաև Ստամբուլի նահանգապետ Դավութ Գյուլը այն բանի համար, որ ականատես է եղել, սակայն չի միջամտել և չի կանխել հոգեբանական և ֆիզիկական բռնությունները, որոնց ակտիվիստները ենթարկվել են նախագահական թիկնազորի կողմից։

Համաձայն փաստաթղթի՝ ցուցարարների հագուստը հանել են ոստիկանական բաժանմունքում, իսկ խուզարկության ժամանակ «շոշափել են նրանց մարմինն ու անձնական տարածքները», իսկ բանտում մեկ այլ խուզարկության ժամանակ հանել է նաև նրանց բոլոր հագուստները, ներառյալ՝ ներքնաշորերը։

Ակտիվիստների ձերբակալությունները հաջորդել են Իսրայելի հետ Թուրքիայի առևտրային հարաբերությունների ուժեղացված հսկողությանը: Զեկույցները ցույց են տալիս, որ թուրքական Ջեյհան նավահանգստից դեպի Իսրայել հում նավթի շարունակական առաքումները՝ չնայած մայիսին հայտարարված առևտրային էմբարգոյին:

Թարգմանությունը՝ Էմմա Չոբանյանի