25.08.2026 | 23:30
Ծանրորդ Հարություն Ավետիսյանը` պատանիների Եվրոպայի առաջնության բրոնզե մեդալակիր
0-ի փոխարեն 10 տոկոս տուրք․ ինչպես կազդի Թրամփի որոշումը ՀՀ տնտեսության վրա. ՏԵՍԱՆՅՈՒԹ
Քաղաքականություն
03.04.2025 | 20:50
ԱՄՆ նախագահ Դոնալդ Թրամփը մաքսատուրքեր սահմանեց Միացյալ Նահանագներ ներմուծվող ապրանքների վրա՝ ապրիլի 2-ն անվանելով «Ազատագրման օր»։ Թրամփը Սպիտակ տան Վարդերի պարտեզում ելույթի ընթացքում ցուցադրել է մի աղյուսակ, որտեղ ներկայացված են ավելի քան 100 երկրներ և տուրքերի սահմանված չափերը։ Մաքսատուրքերը չեն շրջանցի նաև Հայաստանի արտահանողներին․ ըստ Թրամփի հրապարակած ցանկի՝ ՀՀ-ից ԱՄՆ ներկրվող ապրանքների համար կգանձվի 10 տոկոս տուրք։
Հայաստանից ավելի քան 3600 անուն ապրանք էր առանց մաքսատուրքի արտահանվում ԱՄՆ՝ ասում է տնտեսագետ, Հայաստանի գործատուների հանրապետական միության նախագահ Գագիկ Մակարյանը։ Նրա խոսքով՝ ԱՄՆ արտահանվում են վերարկուներ, կիսավերարկուներ, կոստյումներ, ծխախոտ, բանջարեղեն, մրգեր, պահածոներ, գինի, խմելու ջուր, օղի, ինչպես նաև ոսկերչական իրեր, էլեկտրոնային սարքեր, շոկոլադ։
Հայաստանի ընդհանուր արտահանումը 16 մլրդ դոլարի է հասնում, որից 50 միլիոնն է բաժին ընկնում ԱՄՆ-ին։ Մակարյանի կարծիքով՝ չնայած սա մեծ գումար չէ, սակայն կարևորն այստեղ նմանատիպ երկրի հետ առևտուր ունենալն է։
Տնտեսագետ Աղասի Թավադյանն էլ նշում է՝ չնայած 2022-2023 թվականներին Հայաստանից դեպի ԱՄՆ արտահանման որոշակի աճ է արձանագրվել, վերջին երկու տարիներին անկում կա։
ՀՀ-ն այն երկրների թվում է, որոնց նկատմամբ Թրամփը սահմանել է նվազագույն մաքսատուրքը։ Օրինակ՝ Եվրամիությունից ներմուծվող ապրանքների համար նա մաքսատուրքեր է սահմանել 20 տոկոսի չափով, Չինաստանի համար՝ 34 տոկոս, Ճապոնիայի համար՝ 24, Հնդկաստանի համար՝ 26 տոկոս։ Վրաստանի, Ադրբեջանի ու Թուրքիայի, Իրանի համար նույնպես նվազագույն՝ 10 տոկոս տուրք է սահամանվել։ Ուշագրավ է, որ ցուցակում ներառված չեն ՌԴ-ն, Բելառուսը։
Նոր կարգավորումն ուժի մեջ կմտնի ԱՄՆ ժամանակով ապրիլի 3-ի կեսգիշերին։
Մանրամասները՝ տեսանյութում։
Անի Թամրազյան
