15.04.2025 | 15:12
Ալեն Սիմոնյանը և Անդրանիկ Քոչարյանը գրկախառնվեցին. ՏԵՍԱՆՅՈՒԹ
Ինձ ձերբակալել են ճշմարտությունն ասելու համար․ Բաքվի դատարանը հայտնի քաղաքագետին 4 ամսով կալանավորել է
Քաղաքականություն
10.12.2024 | 23:28
Բաքվի Յասամալի շրջանային դատարանը Ադրբեջանում հայտնի քաղաքագետ, Քաղաքական կառավարման ինստիտուտի տնօրեն Ազեր Գասիմլիին 4 ամսով կալանավորելու որոշում է կայացրել, գրում են ադրբեջանական լրատվամիջոցները։
Գասիմլին մեղադրվում է տուժող Գուրբանալի Յուսիբովից գումար շորթելու մեջ, սակայն նրա փաստաբաններ Ռովշանա Ռահիմլին ու Ագիլ Լաիջը հայտարարել են, որ կա դատարանի օրինական ուժի մեջ մտած վճիռ, որը հաստատում է, որ տղամարդը գումար է պարտք Գասիմլիին։
Ինքը՝ Ազեր Գասիմլին, հայտարարել է, որ իր ձերբակալությունը քաղաքական դրդապատճառներ ունի՝ պնդելով, որ իրեն պատժում են ճշմարտությունն ասելու համար։
«Այսօր Ադրբեջանում քաղաքականություն չկա, ես էլ քաղաքական գործիչ չեմ։ Որովհետև որտեղ չկա քաղաքականություն, այնտեղ չկան քաղաքական գործիչներ։ Ես այստեղ եմ, քանի որ ճշմարտությունն եմ ասում»,- նշել է նա։
Պաշտպանական կողմը բողոքարկելու է կալանքի որոշումը։
Նշենք, որ Գասիմլին ձերբակալվել էր դեկտեմբերի 8-ի առավոտյան՝ Ադրբեջանի Քրեական օրենսգրքի 182.2.3 հոդվածի (շորթում սպառնալիքներով) հատկանիշներով մեղադրանքով: Այս հոդվածով նրան սպառնում է 5-ից 10 տարի ժամկետով ազատազրկում։
Գասիմլիին նոյեմբերի 22-ին թույլ չէին տվել երկրից դուրս գալ։ Երեք օր անց նա Բաքվի ոստիկանությունում որպես վկա հարցաքննվել էր մի քանի քրեական գործերով։
Թարգմանությունը՝ Էմմա Չոբանյանի
