07.03.2026 | 22:11
Նոր նշանակումներ՝ մարմնամարզության Հայաստանի հավաքականներում
Հայաստանն ու Ֆրանսիան ընդլայնում են համագործակցությունը համակարգչային գիտության ոլորտում
Տնտեսություն
13.07.2017 | 11:45
ՀՀ տրանսպորտի կապի և տեղեկատվական տեխնոլոգիաների նախարար Վահան Մարտիրոսյանը հյուրընկալել է Թուլուզի (Ֆրանսիա) Համակարգչային գիտության ազգային ինստիտուտի (ՀԳԱԻ) տնօրեն, պրոֆեսոր Միշել Դայդեին, ֆրանսիական մի շարք բուհերի ներկայացուցիչների` ՀՀ ԳԱԱ փոխնախագահ, ակադեմիկոս Յուրի Շուքուրյանի ուղեկցությամբ։
Նախարարը, ողջունելով հյուրերին, գոհունակություն է հայտնել տեղեկատվական տեխնոլոգիաների և համակարգչային գիտության բնագավառում հայ-ֆրանսիական 15-ամյա արդյունավետ համագործակցության համար։ Միշել Դայդեն նույնպես ընդգծել է բարձր արտադրողականությամբ հաշվողական միջոցների ուղղությամբ երկարամյա հաջող գործակցությունը, ներկայացրել վերջին տարիներին իրականացվող կրթական նախագծերի արդյունքները:
Յուրի Շուքուրյանն անդրադարձել է Հայաստանում ինֆորմատիկայի զարգացման միտումների և հաշվողական գիտության ոլորտի վերաբերյալ ԳԱԱ-ի փորձին:
Հյուրերը հայտնել են, որ Համակարգչային գիտության ազգային ինստիտուտը պատրաստվում է Հայաստանի ԳԱԱ-ին նվիրել իրենց, այսպես կոչված, սուպեր համակարգիչը, որն ունակ է լուծելու տարբեր ոլորտներին վերաբերող դժվարագույն խնդիրներ ու հաշվարկներ։
Վահան Մարտիրոսյանը հայտնել է, որ կառավարությունը պատրաստակամ է աջակցել այս և մյուս ծրագրերի իրագործմանը։
Հանդիպման ընթացքում, որպես օրինակ, ներկայացվել են տրանսպորտային համակարգի արդիականացման ուղղությամբ անհրաժեշտ մաթեմատիկական հաշվարկները, ընդգծվել է նաև, որ տնտեսության տարբեր բնագավառներում առկա խնդիրների համար չափազանց օգտակար կլինի նվիրաբերվող սուպեր համակարգիչը։
