Ինչո՞ւ Փաշինյանը հավասարեցրեց «Արևմտյան Հայաստանը» Ալիևի «Արևմտյան Ադրբեջանին»․ վտանգավոր հետևանքներ սպասե՞լ. ՏԵՍԱՆՅՈՒԹ

Կանաչ լույս՝ ՀՀ-ի հանդեպ Ադրբեջանի տարածքային հավակնությունների նկատմա՞մբ, թե՞ ինքնահայեցում և հարևանների հետ խաղաղ ապրելու ձգտում. այս հարցը վերջին օրերին թեժ բանավեճերի առարկա է դարձել։ Վարչապետն օրերս Հ1-ի եթերում հայտարարեց․ «Հիմա մենք ինչքան նեղվում ենք և շատ ծանր ենք տանում և պրոբլեմ ենք համարում, որ ինչ-որ տեղ ինչ-որ մարդիկ օգտագործում են «Արևմտյան Ադրբեջան» տերմինը, չէ՞, բա մենք որ ասում ենք Արևմտյան Հայաստան, չենք մտածո՞ւմ, որ ինչ-որ մարդկանց դա գրգռում է: Ոնց որ ասում են «Արևմտյան Ադրբեջան», մեզ է գրգռում, այդպես էլ ոնց որ ասում ենք Արևմտյան Հայաստան, ուրիշներին է գրգռում»։

Ի՞նչ մոտիվացիա ուներ վարչապետ Փաշինյանը՝ նույնացնելով «Արևմտյան Հայաստան» և «Արևմտյան Ադրբեջան» եզրույթները։ Եթե նախկինում Ադրբեջանում «Արևմտյան Ադրբեջան» տերմինն օգտագործում էին հասարակական գործիչների մակարդակով, այսօր արդեն երկրի բարձրագույն իշխանության։ Եվ սա այն համատեքստում, երբ ինքը՝ վարչապետ Փաշինյանն է հայտարարել, որ Ադրբեջանն ունի տարածքային պահանջներ ՀՀ-ի նկատմամբ՝ ամրագրված իր Սահմանադրությամբ։

Արդյո՞ք Հայաստանի վարչապետը կոռեկտ համեմատություն է արել՝ ոչ միայն թեմայի պատմական շերտերի, այլև՝ քաղաքական իմաստով։ «Արևմտյան Հայաստան» և «Արևմտյան Ադրբեջան» եզրույթները համեմատելի՞ են։ Արդյո՞ք Ադրբեջանը զենք չստացավ Հայաստանի դեմ։
Factor TV-ում հրավիրել ենք քննարկում, որին մասնակցում են Ազատ Արշակյանը՝ հանրային գործիչ, Արա Պապյանը՝ ԱԺԲ խորհրդի անդամ, դիվանագետ, Հրանուշ Խառատյանը՝ ազգագրագետ, Գարեգին Միսկարյանը՝ Ժողովրդավարական հարթակ հիմնադրամի տնօրեն, Բորիս Նավասարդյանը՝ քաղաքական վերլուծաբան։