ԲԱՆԱՎԵՃ․ Թանկարժեք նվերներ՝ բարձրաստիճան պաշտոնյաներին․ օրինակա՞ն է նրանց հարստացումը

Կասկածահարույց նվիրատվություններ խոշոր դրամական միջոցների, բնամթերքի տեսքով՝ բարձրաստիճան պաշտոնյաներին։ «Ինֆոքոմ»-ը պարզել է, որ ավելի քան 2 մլրդ 112 մլն դրամի չափով նվիրատվություն 2023 թվականին ստացել են ՊԵԿ-ի, դատական համակարգի, ուժային կառույցների, մարզային պաշտոնյաները։ Մարզային համայնքների 20 պաշտոնյա ընդհանուր 596 մլն դրամի 31 նվիրատվություն է ստացել 30 նվիրատուից։ Օրինակ՝ Վեդի համայնքի ղեկավար, ՔՊ-ական Գարիկ Սարգսյանը ստացել է 53 մլն դրամ նվիրատվություն։ Գլխավոր դատախազությունը քրեական վարույթ չի նախաձեռնել։ ՔՊ-ական ևս մեկ պաշտոնյա՝ Թալին համայնքի ղեկավար Տավրոս Սափեյանը 19,5 մլն դրամ է ստացել ԱՄՆ-ում ավտոմեքենաների վաճառքով զբաղվող ընկերությունից։ Factor TV-ի հետ զրույցում Սափեյանը նշեց՝ համայնքի համար է նվիրատվություն ստացել։

Աշտարակի ավագանու ՔՊ-ական անդամ Գնել Սուքիասյանը 305 մլն 688 հազար դրամ է նվեր ստացել եղբորից։ Աբովյան համայնքի ղեկավարի նախկին տեղակալ Արթուր Մովսիսյանը հորից 98 մլն դրամ նվիրատվություն է ստացել, և այլն։ «Ինֆոքոմ»-ի արձանագրած տվյալների հիման վրա Կոռուպցիայի կանխարգելման հանձնաժողովը նախաձեռնել է 3 վարչական վարույթ։

Ինչի՞ մասին են վկայում բարձրաստիճան պաշտոնյաներին խոշոր դրամական նվիրատվությունները, հատկապես, երբ նվիրատուների մի մասը չի ունեցել այնքան գումար՝ ինչքան նվիրաբերել է պաշտոնյայի։ Արդյո՞ք առկա չեն կոռուպցիոն դրսևորումներ։

Factor TV-ում հրավիրել ենք քննարկում, որին մասնակցում են Սևակ Մամյանը՝ «Ինֆոքոմ»-ի գլխավոր խմբագիր, Գրիշա Բալասանյանը՝ «Հետք»-ի լրագրող, Տիգրան Մուղնեցյանը՝ Թրանսփարենսի ինթերնեշնլ հակակոռուպցիոն կենտրոնի հետազոտող, Դանիել Իոաննիսյանը՝ ԻՔՄ ծրագրերի համակարգող, Լիլիթ Մինասյանը՝ ՀՀ ԱԺ ՔՊ խմբակցության պատգամավոր։

Հաղորդումն ամբողջությամբ՝ տեսանյութում։

Ռոբերտ Անանյան