26.05.2026 | 23:35
Վաղը առավոտյան ՀՀ ԶՈՒ ավիացիան Երևանի կենտրոնում կատարելու է թռիչք. ՊՆ
Ըստ Լավրովի՝ Կովկասում հապճեպ խաղաղությունը ոչ մի լավ բանի չի հանգեցնի
Քաղաքականություն
05.11.2024 | 17:48
Ռուսական կողմը չի դրդում Երևանին և Բաքվին հապճեպ խաղաղության պայմանագիր կնքել, ՌԻԱ Նովոստիին տված հարցազրույցում հայտարարել է ՌԴ արտգործնախարար Սերգեյ Լավրովը։
«Մենք ողջունում ենք ադրբեջանա-հայկական խաղաղ գործընթացի շրջանակում ձեռք բերված զգալի առաջընթացը։ Հաշվի առնելով երկար տարիների թշնամանքը, ռազմական գործողությունները և երկու կողմերի զոհերը՝ հասկանում ենք, թե որքան դժվար է Բաքվի և Երևանի համար առաջընթացի հասնելը։ Այս ամենը պահանջում է կողմերի ոչ միայն զգալի ջանքեր՝ փոխադարձաբար ընդունելի լուծումներ գտնելու համար, այլև ժամանակ։ Այդ իսկ պատճառով, ի տարբերություն արևմտյան կեղծ միջնորդների, մենք մեր գործընկերներին չենք մղում հապճեպ խաղաղության պայմանագիր կնքելու»,- ասել է ռուսաստանցի պաշտոնյան։
Լավրովի խոսքով՝ ռուսական կողմը վստահ է, որ «հապճեպ խաղաղությունը, առանց Բաքվի և Երևանի դիրքորոշումների, ինչպես նաև տեղում իրողությունների համակողմանի դիտարկման, ոչ մի լավ բանի չի հանգեցնի, հակառակը, լրացուցիչ ռիսկեր կստեղծի լարվածության և հակամարտության հնարավոր սրման»:
«Ռուսաստանը շահագրգռված է կայուն խաղաղությամբ և Հարավային Կովկասում կայունությամբ»,- եզրափակել է ՌԴ ԱԳՆ ղեկավարը։
Թարգմանությունը՝ Տաթև Ֆռանգյանի
