04.04.2026 | 20:03
ՃՏՊ՝ հրդեհի բռնկմամբ
Ուզբեկստանում տղամարդը դատապարտվել է 5 տարվա ազատազրկման՝ ՌԴ-ի կողմից Ուկրաինայի դեմ պատերազմին մասնակցելու համար
Քաղաքականություն
05.11.2024 | 16:59
Ուզբեկստանի դատարանն Ուկրաինայում ռազմական գործողություններին ռուսական բանակի կազմում մասնակցելու գործով երկրի քաղաքացուն 5 տարվա ազատազրկման է դատապարտել ընդհանուր ռեժիմի գաղութում։ Այս մասին հայտնում է UzNews-ը՝ հղում կատարելով դատարանի որոշմանը։
Պարբերականը հրապարակել է միայն դատապարտյալի անվան ու ազգանվան սկզբնատառերը՝ Ա.Խ.։ Ըստ քննիչների՝ 2023 թվականի մայիսին Ուզբեկստանի քաղաքացին մեկնել է Ռուսաստան՝ արտագնա աշխատանքի։ Նույն տարվա նոյեմբերին, ենթադրվում է, որ «նա դավադրության մեջ է մտել մի խումբ անձանց հետ և որոշել է աջակցել Ռուսաստանի զինված ուժերին Ուկրաինայի հետ հակամարտության շրջանակում»։
Գործի նյութերի համաձայն՝ Ուզբեկստանի քաղաքացին մեկ տարով պայմանագիր է կնքել ՌԴ ՊՆ-ի հետ, որից հետո հատուկ ռազմական պատրաստություն է անցել Ֆինլանդիայի հետ սահմանի մոտ գտնվող բազայում, որտեղ սովորել է զենք օգտագործել, ինչպես նաև մարտական գործողություններ վարել այլ վարձկանների հետ միասին:
2024 թվականի հունվարին Ա.Խ.-ին տեղափոխել են Բելգորոդի շրջանի զորավարժարան՝ մարզումները շարունակելու համար, իսկ փետրվարին ուղարկել ռազմաճակատ, որտեղ հետագայում վիրավորվել է՝ անօդաչու թռչող սարքից նրա վրա արկ է ընկել, ինչի հետևանքով նա վնասվածքներ է ստացել գլխի, ձեռքի և ոտքի շրջանում: Տղամարդուն տեղափոխել են Մոսկվայի շրջանի հիվանդանոց, իսկ հուլիսին նա վերադարձել է Ուզբեկստան։
Դատարանում տղամարդն ընդունել է մեղքը և հայտարարել, որ զղջացել է իր արարքի համար։
Թարգմանությունը՝ Տաթև Ֆռանգյանի
