Քաղաքականություն
04.11.2024 | 13:35
Եվրամիությունը, ՆԱՏՕ-ից բացի, պետք է անվտանգության սեփական կազմակերպությունը ստեղծի, հայտարարել է Եվրախորհրդարանի նախագահ Ռոբերտա Մեցոլան։
«Եվրամիությունը միշտ պետք է լինի ավելի ուժեղ, ավելի համահունչ և արդյունավետ։ Ես նույն բանն եմ ասում, երբ խոսքը վերաբերում է, օրինակ, իրական անվտանգության ու պաշտպանության միություն ստեղծելուն։ Միություն, որը մենք վաղուց պահանջում էինք, որը կլրացներ ՆԱՏՕ-ին և չէր մրցի դաշինքի հետ»,- ասել է նա El Mundo-ին տված հարցազրույցում։
Նա հավելել է, որ Եվրոպան գտնվում է ծայրահեղ անկայուն իրավիճակի շեմին, որը պայմանավորված է Ուկրաինա ռուսական ներխուժմամբ։ Ըստ Մեցոլայի՝ ԵՄ-ն պետք է պատրաստ լինի ամեն ինչի՝ անկախ ԱՄՆ նախագահական ընտրություններից:
«Հունվարին կլինի նոր նախագահ, հետևաբար՝ նոր վարչակազմ։ Կլինեն նաև նոր Սենատ և նոր Կոնգրես, որոնք մեր գործընկերներն են, երբ խոսքը վերաբերում է Ուկրաինային օգնություն տրամադրելու վերաբերյալ քվեարկությանը: Հուսով եմ, որ մենք կկարողանանք շարունակել աշխատել միասին»,- հավելել է պաշտոնյան։
Հուլիսի կեսերին Եվրահանձնաժողովի ղեկավար Ուրսուլա ֆոն դեր Լեյենը, որը վերընտրվել է երկրորդ ժամկետով, ասել է, որ մտադիր է առաջնահերթություն տալ արտաքին սպառնալիքներից ԵՄ անվտանգությանն ու պաշտպանությանը։
Թարգմանությունը՝ Տաթև Ֆռանգյանի
