22.06.2026 | 13:44
Իրանի ֆուտբոլի հավաքականը հանդերձարանում շնորհակալական նամակ է թողել Աշխարհի առաջնությունը հյուրընկալող Լոս Անջելեսին
Վրաստանի դատախազությունը ընտրությունների ընթացքում հանցագործության 47 դեպքի հետաքննություն է սկսել
Քաղաքականություն
31.10.2024 | 21:14
Վրաստանի Գխավոր դատախազությունը հետաքննություն է սկսել 47 քրեական գործով՝ ենթադրյալ հանցագործությունների վերաբերյալ, որոնք կատարվել են նախընտրական շրջանում և հոկտեմբերի 26-ին երկրում անցկացված խորհրդարանական ընտրությունների օրը։ Մասնավորապես, հետաքննվում են ընտրակեղծիքների, ընտրողների կամքի վրա ներգործության, քվեարկության գաղտնիությունը խախտելու և ընտրողներին ընտրակաշառք տալու հետ կապված դեպքերը, հայտնում են գերատեսչության մամուլի ծառայությունից։
Գլխավոր դատախազությունը հաստատել է նաև Սադախլո գյուղի ընտրատեղամասում տեղի ունեցած միջադեպի առնչությամբ ՆԳՆ-ի տեղեկատվությունը՝ երկու անձի բերման ենթարկելու մասին։ Այնտեղ քվեարկության ժամանակ լցոնումներ են տեղի ունեցել։
Ընտրակեղծիքների հոդվածով (Վրաստանի Քրեական օրենսգրքի 1643-րդ հոդված) մեղադրանք է առաջադրվել երկու քաղաքացու։ Այս հոդվածով նախատեսված պատիժը նախատեսում է մինչև երկու տարվա ազատազրկում։
Գերատեսչությունում նշել են, որ մարդիկ, ովքեր նախկինում հայտարարել են ընտրակեղծիքների մասին, ներկայում հրաժարվում են ցուցմունքներ տալ և չեն համագործակցում հետաքննության հետ։ Դատախազությունը նման անձանց կոչ է արել «ժամանակին ներկայանալ քննչական մարմիններ» և սկսել համագործակցել օբյեկտիվ հետաքննության համար։
Խորհրդարանական ընտրությունները Վրաստանում տեղի են ունեցել հոկտեմբերի 26-ին ։ Կենտրոնական ընտրական հանձնաժողովի տվյալներով՝ իշխող «Վրացական երազանքը» հաղթել է ձայների շուրջ 54%-ով։ Ընդդիմադիր կուսակցությունները և պետության ղեկավար Սալոմե Զուրաբիշվիլին հրաժարվել են ճանաչել ընտրությունների արդյունքները և բողոքի ակցիաներ են կազմակերպել։
Դատախազությունը սկսված հետաքննության շրջանակում հարցաքննության է հրավիրել երկրի նախագահին, սակայն Զուրաբիշվիլին հայտարարել է, որ մտադիր չէ ներկայանալ։
Թարգմանությունը՝ Տաթև Ֆռանգյանի
