06.12.2025 | 13:22
Գուգարաց թեմի քահանաները հանդես են եկել հայտարարությամբ՝ ի պաշտպանություն Գարեգին Բ կաթողիկոսի
Բորելը Թուրքիան «կարևոր ու էական» երկիր է անվանել՝ աշխարհաքաղաքական բարդ պայմաններում
Քաղաքականություն
31.10.2024 | 21:43
Ներկա պայմաններում Թուրքիան կարևոր է, էական, քանի որ աշխարհաքաղաքական համատեքստն ամենաբարդն է տևական ժամանակ ի վեր: Այս մասին հայտարարել է ԵՄ արտաքին քաղաքականության ղեկավար Ժոզեպ Բորելը՝ մամուլի ասուլիսում ներկայացնելով 2024 թվականի ընդլայնման փաթեթը։
«Մենք կշարունակենք համագործակցել Թուրքիայի հետ։ Առաջնորդներն այս տարվա ապրիլին Եվրախորհրդում վերահաստատել են Եվրամիության շահագրգռվածությունը՝ զարգացնելու համագործակցային և փոխշահավետ հարաբերությունները Թուրքիայի հետ ռազմավարական, քաղաքական և տնտեսական առումներով: Ես շատ եմ աշխատել մեր հարաբերություններում բացասական պարույրը շրջելու համար: Սկզբում ամեն ինչ շատ ավելի բարդ էր, քան այսօր։ Ի վերջո, Թուրքիան ԵՄ թեկնածու երկիր է, որի աշխարհաքաղաքական արդիականությունը շատ ավելի մեծացել է»,- ասել է Բորելը։
Նա նշել է, որ ընդլայնումը մնում է առանցքային ԵՄ աշխարհաքաղաքական մոտեցման համար։ Դիտարկմանը, որ Թուրքիան լիովին չի համապատասխանում Եվրամիության արտաքին քաղաքականությանը, անվտանգությանն ու միգրացիային, իսկ ԵՄ-ն ծրագրում է Թուրքիայի հետ նոր բարձր մակարդակի խորհուրդ ստեղծել, Բորելը նշել է, որ ակնհայտ է՝ ԵՄ-ի արտաքին քաղաքականության հետ համապատասխանության մակարդակը շատ ցածր է։
«Այն ոչ միայն շատ ցածր է, այլև նվազում է։ Չնայած այն միակ երկիրը չէ, որն ունի ցածր համապատասխանության մակարդակ։ Ճիշտ է նաև, որ կան ոլորտներ, որտեղ առաջընթաց չի գրանցվել, մասնավորապես, հիմնարար իրավունքների պաշտպանության և այլ ոլորտներում։ Ճիշտ է նաև, որ զեկույցը ճանաչում է Թուրքիայի ջանքերը այնպիսի ոլորտներում, ինչպիսիք են առևտուրը, փողերի լվացման դեմ պայքարը, հետազոտություններն ու նորարարությունները, ինչպես նաև տնտեսական ու դրամավարկային քաղաքականությունը»,- ասել է Ժոզեպ Բորելը։
Թարգմանությունը՝ Էմմա Չոբանյանի
