21.02.2026 | 10:27
Ստեփանծմինդա-Լարս ավտոճանապարհը փակ է կցորդով բեռնատարների համար
Հյուսիսկորեացի 3000 զինծառայողներ արդեն Կուրսկի շրջանում են․ FT
Քաղաքականություն
30.10.2024 | 19:39
Կուրսկի մարզում՝ Ուկրաինայի սահմանից 50 կմ հեռավորության վրա, հյուսիսկորեացի շուրջ 3 հազար զինծառայողներ են տեղակայվել։ Այս մասին հայտնում է Financial Times-ը՝ վկայակոչելով Ուկրաինայի հետախուզության բարձրաստիճան պաշտոնյաներին, գրում է BBC-ի ռուսական ծառայությունը։
Նշվում է, որ զինվորականներին այս շաբաթ գաղտնի տեղափոխել են Հեռավոր Արևելքից։
Հարավային Կորեայի հետախուզությունը պնդում է, որ հոկտեմբերի սկզբին Ռուսաստան ժամանած առաջին հյուսիսկորեական զորքերը ներկայացնում են Հյուսիսային Կորեայի բանակի էլիտար 11-րդ բանակային կորպուսը։ Սակայն ուկրաինական հետախուզությունը կասկածի տակ է դրել Հյուսիսային Կորեայի զինված ուժերի որակն ու մարտունակությունը: Ուկրաինայի հետախուզության աշխատակիցները նրանց անվանել են «անփորձ ցածր աստիճանի հետևակայիններ»:
«Նրանք երբևէ նախկինում չեն լքել երկիրը։ Նրանք երբեք չեն կռվել իրական մարտում, նրանց փորձը շատ հեռու է ժամանակակից պատերազմի իրականությունից»,- ասել է ուկրաինական հետախուզության աղբյուրը։
Հարավկորեական հետախուզության տվյալներով՝ Փհենյանը կարող է 12 հազար զինվորականի ուղարկել Ռուսաստան։
ՌԴ նախագահ Վլադիմիր Պուտինը, մեկնաբանելով հյուսիսկորեացի զինվորականներին Ռուսաստան ուղարկելու մասին լուրերը, չէր հերքել տեղեկությունը, սակայն չէր հստակեցրել, թե ինչ նպատակով են նրանք ժամանել։
Թարգմանությունը՝ Էմմա Չոբանյանի
