07.10.2026 | 19:12
Թուրքական նավերի վրա հարձակումներից հետո Էրդողանը Պուտինի հետ Սև ծովում անվտանգության հարցն է քննարկել
Էրդողանը մեկնաբանել է Օջալանի ցմահ ազատազրկումը վերանայելու և PKK-ի լուծարման մասին հայտարարությունները
Քաղաքականություն
30.10.2024 | 17:28
Թուրքիայի նախագահ Ռեջեփ Թայիփ Էրդողանը խորհրդարանում իր ղեկավարած «Արդարություն և զարգացում» կուսակցության նիստում անդրադարձել է իր դաշնակից MHP-ի առաջնորդ Դևլեթ Բահչելիի հայտարարությանը, որով վերջինը PKK-ի բանտարկված առաջնորդ Աբդուլլահ Օջալանին հրավիրել էր Ազգային ժողովում ելույթի ու առաջարկել լուծարել PKK-ն։
TRT Haber-ի հաղորդմամբ՝ Էրդողանն ասել է, որ այսօր բացառիկ հնարավորություն կա լուծելու տևական խնդիրները, ամրապնդելու եղբայրությունը և մեծացնելու Թուրքիան եղբայրության առանցքի վրա։
«Ուզում եմ իմ խմբի անունից ևս մեկ անգամ մեր ողջույններն ու երախտագիտությունը հայտնել «Ժողովրդական դաշինքի» մեր գործընկեր, «Ազգայնական շարժում» կուսակցության նախագահ պարոն Դևլեթ Բահչելիին։ Նրանք, ովքեր կարդում են «Ազգայնական շարժում» կուսակցության նախագահի վերջին կոչերը, տեսնում են մեր առջև բացված պատմական հնարավորությունների պատուհանը և ոգևորվում։ Մյուս կողմից՝ նրանք, ովքեր երկրի ու ազգի ընդհանուր շահերի փոխարեն իրենց անձնական և խմբային նպատակներն են հետապնդում, շարունակում են պայքարել անհետևողականության ու դատարկ խոսքերի ճահճում»,- ասել է նա։
Էրդողանը նաև հայտարարել է, թե Թուրքիան 85 մլն մարդու հայրենիքն է։
«Այս Հանրապետությունը թուրքերին է, քրդերինը, լազերի, չերքեզների, արաբների, հույների, գնչուների հանրապետությունն է, այսինքն՝ այստեղ ապրող բոլորի, որոնք ասում են՝ «Ես Թուրքիայի Հանրապետության պատվավոր քաղաքացին եմ»»,-հայտարարել է Թուրքիայի նախագահը։
Ավելի վաղ Էրդողանի դաշնակից, «Ազգայնական շարժում» կուսակցության (MHP) առաջնորդ Դևլեթ Բահչելին առաջարկել էր վերանայել Աբդուլլահ Օջալանի ցմահ ազատազրկման պայմանները, եթե քուրդ զինյալների առաջնորդը համաձայնի հայտարարել արգելված Քուրդիստանի աշխատավորական կուսակցության (PKK) լուծարման մասին։
Թարգմանությունը՝ Էմմա Չոբանյանի
