11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Զելենսկին իր «հաղթական ծրագրի» գաղտնի մասում ԱՄՆ-ից Tomahawk թևավոր հրթիռներ է խնդրել․ NYT
Քաղաքականություն
29.10.2024 | 21:13
Ամերիկյան The New York Times-ը, հղում անելով անանուն աղբյուրներին, պնդում է, որ Ուկրաինայի նախագահ Վլադիմիր Զելենսկին իր «հաղթական ծրագրի» գաղտնի մասում ԱՄՆ-ից Tomahawk թևավոր հրթիռներ է խնդրել։ Ըստ թերթի անանուն զրուցակցի՝ ԱՄՆ իշխանությունները մերժել են այս խնդրանքը՝ համարելով բոլորովին անիրատեսական՝ թե՛ քաղաքական, թե՛ օբյեկտիվ պատճառներով։
Tomahawk-ի հեռահարությունը 1500 մղոն է, այսինքն՝ ավելի քան 2400 կմ: Ուկրաինայի տարածքից դրանք կարող են ընդգրկել Ռուսաստանի ամբողջ եվրոպական հատվածը և Ուրալից այն կողմ գտնվող հսկայական տարածք՝ մինչև Օմսկի մարզի արևմտյան շրջանները։
Նախ, քաղաքական նկատառումներից ելնելով, ԱՄՆ-ն Ուկրաինային թույլ չի տալիս հարվածներ հասցնել ՌԴ տարածքի խորքերը նույնիսկ իր ATACMS մարտավարական հրթիռներով, որոնց հեռահարությունը շուրջ յոթ անգամ ավելի փոքր է։
Երկրորդ՝ Ռուսաստանում պոտենցիալ ռազմական թիրախների թիվը զգալիորեն գերազանցում է այն հրթիռների թիվը, որոնցից ԱՄՆ-ը տեսականորեն կարող էր հրաժարվել՝ չխաթարելով սեփական զինված ուժերի մարտունակությունը:
Ըստ NYT-ի զրուցակցի՝ Tomahawks-ը, ըստ Զելենսկիի, պետք է դառնար «ոչ միջուկային զսպման տարր»։
Պաշտոնական Կիևը դեռևս չի մեկնաբանել NYT-ի այս հրապարակումը։
Թարգմանությունը՝ Տաթև Ֆռանգյանի
