Գորշ գոտիներ և հիբրիդային պատերազմներ․ երկօրյա աշխատաժողովում քննարկվում են դիմակայունության աստիճանի բարձրացման հնարավորությունները

Ազգային դիմակայունության հայկական ինստիտուտը և լեհական The Opportunity”-Institute for Foreign Affairs վերլուծական կենտրոնը մեկնարկել են երկօրյա աշխատաժողով՝ նվիրված գորշ գոտիներին (Grey Zones), ինչպես նաև՝ հիբրիդային պատերազմների (Hybrid Warfare) ժամանակաշրջանում պետական և ոչ-պետական կառույցների դիմակայունության աստիճանի բարձրացման հնարավորությունների ուսումնասիրմանը:

ՆԱՏՕ-ի Գիտություն հանուն խաղաղության և անվտանգության (Science for Peace and Security) ծրագրի աջակցությամբ իրականացվող միջոցառմանը մասնակցում է ավելի քան 20 փորձագետ Հայաստանից, Շվեյցարիայից, Վրաստանից, Ուկրաինայից, Լեհաստանից, Լիտվայից, Բուլղարիայից, Ռումինիայից և ԱՄՆ-ից՝ հիբրիդային պատերազմների մարտահրավերներին դիմակայելու համար:

Աշխատաժողովի աշխատանքներն կենտրոնացած էին գորշ գոտիների և հիբրիդային սպառնալիքների վերաբերյալ ընկալումների խորացման վրա: Քննարկումները ընդգծեցին գորշ գոտիների ոչ միանշանակ բնույթն արդյունավետորեն սահմանելու, հիբրիդային սպառնալիքների առանձնահատկությունները հասկանալու, ինչպես նաև՝ դասական և ոչ դասական մարտավարությունների համատեղումը վերլուծելու անհրաժեշտությունը:

Հիմնական քննարկումները նվիրված էին հիբրիդային սպառնալիքներին և տարածաշրջանային կայունության մարտահրավերներին, ինչպես նաև՝ Եվրոպայի և այլ տարածաշրջանների, այդ թվում՝ Հարավային Կովկասի և մասնավորապես՝ Հայաստանի անվտանգության վրա հիբրիդային սպառնալիքների հետևանքներին՝ ընդգծելով նաև դրանց ազդեցությունը տարածաշրջանային կայունության վրա: Փորձագետներն անդրադարձ կատարեցին գորշ գոտիների դերին և ազդեցությանը ժամանակակից անվտանգային դինամիկայի ձևավորման վրա և քննարկեցին նման սպառնալիքների փոփոխվող և աճող բնույթը:

Անդրադարձ եղավ հիբրիդային պատերազմներին, դրանց տեսակներին և ժողովրդավարական կայունությունը: Մասնակիցները քննարկեցին, թե ինչպես են ապատեղեկատվությունը, քարոզչությունը և ռազմավարական պատումներն օգտագործվում՝ որպես հիբրիդային պատերազմների գործիքակազմ: Աշխատաժողովի մասնակիցներն անդրադարձան նաև կեղծ լուրերի, ապատեղեկատվության և դավադրության տեսությունների աճող տարածմանը և ընդգծեցին այն մարտահրավերներն ու խոցելիությունները, որոնց բախվում են ժողովրդավարությունները այս մարտավարություններին արձագանքելու ժամանակ:

ՆԱՏՕ-ի այս աշխատաժողովը կոչված է ծառաելու որպես հարթակ ՆԱՏՕ-ի անդամ և գործընկեր պետությունների, ինչպիսիք են Լեհաստանն ու Հայաստանը, համագործակցությունը խթանելու և գործընկերային հարաբերությունների ամրապնդման համար: Նպատակն է աջակցել պետական և ոչ պետական տարբեր հաստատություններում դիմակայունության աստիճանի բարձրացմանը և հնարավորություն տալով ընդհանուր պատկերացում ստեղծել հիբրիդային սպառնալիքների և դրանց գլոբալ և տարածաշրջանային հետևանքների վերաբերյալ: Ստացված գիտելիքները՝ փորձագետների միջև ինտերակտիվ քննարկումներին զուգահեռ, նպաստում են Հայաստանի և ՆԱՏՕ-ի միջև ինստիտուցիոնալ և ակադեմիական հարաբերությունների խորացմանը: