Ուզբեկստանի խորհրդարանական ընտրություններում հաղթել է իշխող կուսակցությունը

Ուզբեկստանում հոկտեմբերի 27-ին անցկացված խորհրդարանական ընտրություններում հաղթող է ճանաչվել իշխող Լիբերալ-դեմոկրատական կուսակցությունը (UzLiDeP): Ընտրությունների նախնական արդյունքներով՝ այն հավաքել է ձայների 35,75%-ը և ստացել 64 մանդատ, հայտնել է Ուզբեկստանի Կենտրոնական ընտրական հանձնաժողովը (ԿԸՀ), փոխանցում է DW-ի ռուսական ծառայությունը։

Երկրորդ տեղում «Միլլիյ Թիքլանիշ» Դեմոկրատական կուսակցությունն է՝ 18,82%-ով, սոցիալ-դեմոկրատական «Ադոլաթ» կուսակցությունը ստացել է ձայների 16,20%-ը, Ուզբեկստանի Ժողովրդադեմոկրատական կուսակցությունը՝ 17,11%-ը, իսկ Ուզբեկստանի էկոլոգիական կուսակցությունը՝ 13,12%-ը։

Ուզբեկստանում խորհրդարանական ընտրություններն առաջին անգամ անցկացվել են խառը համակարգով․ 75 մանդատ բաշխվել է ըստ կուսակցական ցուցակների, 75-ը՝ միամանդատ ընտրատարածքներում։ Իրական ընդդիմադիր ուժերի բացակայության պայմաններում դրանք կարող են հանգեցնել միայն նախագահ Շավքաթ Միրզիյոևին հավատարիմ օրենսդիր մարմնի հերթական ընտրության, որը ղեկավարում է Կենտրոնական Ասիայի ամենախիտ բնակեցված երկիրը 2016 թվականից ի վեր:

Միրզիյոևն ընտրողների շրջանում ժողովրդականություն է ձեռք բերել տնտեսական բարեփոխումների և քաղաքական, կրոնական ու լրատվամիջոցների ազատությունների սահմանափակումների թուլացման շնորհիվ, որոնք գործում էին նրա նախորդի՝ Իսլամ Քարիմովի օրոք:

Այնուամենայնիվ, քաղաքական իշխանությունը մնում է կենտրոնացված նախագահի ձեռքում, և խորհրդարանը միայն կանոնավոր կերպով հաստատում է նրա կաբինետի մշակած օրենքները, նշում է Reuters-ը։

Թարգմանությունը՝ Տաթև Ֆռանգյանի