06.11.2026 | 23:24
Նոյեմբերի 7-ին ՊԵԿ էլեկտրոնային համակարգերը երկու ժամով անհասանելի կլինեն
Ֆրանսիայում Ալիևի քննադատի սպանությունն անդրազգային հանցագործություն է որակվել
Քաղաքականություն
25.10.2024 | 22:55
Ֆրանսիայում սպանված Ադրբեջանի նախագահ Իլհամ Ալիևի քննադատ, քաղաքական էմիգրանտ Վիդադի Իսկանդերլիին հուղարկավորել են հոկտեմբերի 21-ին։ Քննչական խումբը 20 օրից ավելի քաղաքական էմիգրանտի մարմինը պահել է՝ փորձաքննությունն ավարտելու նպատակով։ Իսկանդերլիի սպանությունը որակվել է անդրազգային հանցագործություն, ադրբեջանական լրատվամիջոցներին ասել է Իսկանդերլիի եղբայրը՝ Օգթայ Իսկենդերլին։
«Քննչական մարմնի առաջարկությամբ՝ ընտանիքի միակ անդամն էի, որ ներկա էի հուղարկավորությանը։ Ինձ ասացին, որ հուղարկավորությանը շատ մարդկանց ներկայությունը կարող է լրացուցիչ խնդիրներ առաջացնել: Ընտանիքը նույնպես որոշել է, որ թաղմանը շատ մարդ չմասնակցի։ Հետաքննության ընթացքում Վիդադիի ընտանիքի իրավունքները պաշտպանում են ֆրանսիական պետության կողմից նշանակված երկու փաստաբաններ։ Ներկա պահին հետաքննությունը շարունակվում է։ Բայց նախաքննության ընթացքի մասին մեզ ոչ մի տեղեկություն չեն տալիս։ Հետաքննությունն ընթանում է խիստ գաղտնի պայմաններում»,- պատմել է նա։
Օքթայ Իսկենդերլին ասել է, որ քաղաքական ներգաղթյալների դեմ անդրազգային հանցագործությունները գտնվում են Արևմուտքի ուշադրության կենտրոնում։
«Երեկ Եվրախորհրդարանում (խոսքը Ադրբեջանի վերաբերյալ քննարկման մասին է) լսումներ են եղել։ Ինձ էլ էին հրավիրել։ Ես այնտեղ մասնակցել եմ որպես դիտորդ՝ ոստիկանների ուղեկցությամբ։ Նիստում խոսվել է Վիդադիի մասին, իսկ պատգամավորները բազմիցս ասել են, որ Վիդադիի սպանությունն անդրազգային հանցագործություն է։ Դրանից երկու օր առաջ լսումներ են անցկացվել նաև Չեխիայում։ Հոկտեմբերի 29-ին ԱՄՆ-ում լսումներ կանցկացվեն՝ կապված անդրազգային հանցագործության դեմ պայքարի հետ»,- նշել է նա։
Հիշեցնենք՝ Իսկենդերլին հարձակման էր ենթարկվել Ֆրանսիայի Մյուլուզ քաղաքում իր բնակարանում սեպտեմբերի 29-ին։ Նա երկու օր անց հիվանդանոցում մահացել։ Նրան դանակի 24 հարված էր հասցվել։
Իսկենդերլին հայտնի է Ադրբեջանի կառավարության ու նախագահ Իլհամ Ալիևի հասցեին կոշտ քննադատություններով։ Ադրբեջանում նա զբաղվել է ընդդիմադիր գործունեությամբ, կալանավորվել է և դատապարտվել։ Շուրջ 10 տարի առաջ նա բնակություն է հաստատել Ֆրանսիայում։
Թարգմանությունը՝ Էմմա Չոբանյանի
