Առնվազն յոթ երկիր դեմ է Ուկրաինայի անդամակցությանը ՆԱՏՕ-ին, այդ թվում՝ ԱՄՆ-ն և Գերմանիան. Politico

Առնվազն յոթ երկիր՝ ԱՄՆ-ը, Գերմանիան, Հունգարիան, Սլովակիան, Բելգիան, Սլովենիան և Իսպանիան, չեն շտապում Ուկրաինային հրավիրել ՆԱՏՕ, գրում է Politico-ն։ ՆԱՏՕ-ում ԱՄՆ դեսպան Ջուլիանա Սմիթը պարբերականին տված հարցազրույցում ասել է, որ դաշինքը դեռ պատրաստ չէ Ուկրաինային անդամակցություն առաջարկել։

Ինքը՝ Վլադիմիր Զելենսկին, ասել է, որ Գերմանիան թերահավատորեն է վերաբերվում ՆԱՏՕ-ին միանալու Կիևի պատրաստակամությանը։ Ընդ որում, ինչպես ընդգծում են Politico-ի աղբյուրները, Բեռլինն ու Վաշինգտոնը չեն բացառում, որ ինչ-որ պահի Ուկրաինան կկարողանա դառնալ դաշինքի անդամ։

ՆԱՏՕ-ի ևս երկու երկրներում՝ Հունգարիայում և Սլովակիայում, այժմ իշխանության ղեկին են Կրեմլամետ հայացքներ ունեցող պոպուլիստական կուսակցությունները: Այսպիսով, Հունգարիայի վարչապետ Վիկտոր Օրբանը բազմիցս արգելափակել է Ուկրաինային ռազմական օգնություն տրամադրելու ԵՄ ծրագրերը։

Այնուամենայնիվ, Վաշինգտոնի և ՆԱՏՕ-ի աղբյուրները, որոնք ցանկացել են անհայտ մնալ, Politico-ին հայտնել են, որ այլ երկրներ նույնպես վստահ չեն դաշինքին միանալու Ուկրաինայի պատրաստակամությանը:
«Այնպիսի երկրներ, ինչպիսիք են Բելգիան, Սլովենիան և Իսպանիան, թաքնվում են ԱՄՆ-ի և Գերմանիայի թիկունքում»,- աղբյուրի խոսքերն է մեջբերում պարբերականը։ Մեկ այլ աղբյուր Politico-ին ասել է, որ երկրները «վերացականորեն աջակցում են դրան [ ՆԱՏՕ-ին Ուկրաինայի անդամակցությանը], բայց երբ դա ավելի մոտենա իրականությանը», նրանք կսկսեն ավելի հրապարակայնորեն արտահայտվել այդ գաղափարի դեմ:

ՆԱՏՕ-ին անդամակցելը Վլադիմիր Զելենսկու հաղթանակի պլանի հիմնական կետերից մեկն է, որը նա ներկայացրել է անցյալ շաբաթ։

Թարգմանությունը՝ Տաթև Ֆռանգյանի