14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Հարցաքննվել են Երևանի քաղաքապետարանի պաշտոնյաներ
Քաղաքականություն
21.10.2024 | 20:14
Երևանի քաղաքապետարանի համապատասխան ծառայության պաշտոնատար անձինք, ինչպես նաև քաղաքապետարանի հետ պայմանագրային հարաբերություններ ունեցող «Ավետիսյան Շին Մոնտաժ» ՍՊԸ կապալառու կազմակերպության հիմնադիր տնօրենը հարցաքննվել են։ Factor.am-ի գրավոր հարցմանն ի պատասխան՝ այս մասին հայտնել են Գլխավոր դատախազությունից։
«Պարզվել է, որ Երևան քաղաքի Օղակաձև զբոսայգու 6-րդ հատվածում՝ Սուրբ Գրիգոր Լուսավորիչ եկեղեցու հարակից տարածքում հիմնված պուրակի չորացած «տույա» տեսակի ծառերը փոխարինվել են նորով կապալառու կազմակերպության կողմից՝ առանց հավելյալ վճարումների, քանի որ տվյալ տարածքում իրականացվող անավարտ աշխատանքների պատճառով պուրակը դեռևս չի հանձնվել պատվիրատուին»,- նշված է հարցման պատասխանում։
Հիշեցնենք, որ Factor TV-ն պարզել էր՝ 900,000 դոլարով բարեկարգված Սուրբ Գրիգոր Լուսավորիչ եկեղեցու հարակից այգում տնկված տույաները չորացել են։ Դրանցից յուրաքանչյուրը ձեռք էր բերվել 214 հազար դրամով, ընդհանուր արժեքը՝ 8 միլիոն 572 հազար դրամ։ Շուրջ 20 օր առաջ էլ գրել էինք, որ չորացած տույաները փոխարինվել են նորերով։ Մենք նաև պարզել ենք, որ «Ավետիսյան Շին Մոնտաժ» ընկերության կողմից տնկված նոր տույաների բարձրությունը չի համապատասխանում պայմանագրում նշված թվերին։
Արփի Հակոբյան
