Երևանը դարձավ նյութապաշտների ու ինքնահաստատվողների զոհը, երկնաքերեր քաղաքից դո՛ւրս կառուցեք. Բարսեղ Թումանյան․ ՏԵՍԱՆՅՈՒԹ

«Մեր օպերային թատրոնին վերջերս սկսել են մոտենալ որպես ժամանցի վայրի, բայց թատրոնը ժամանցի համար չէ, այն կրթող, դաստիարակող կոթող պետք է լինի: Մենք ոչ թե ժամանց պետք է առաջարկենք, այլ խնդիրներ բարձրացնենք, օրինակ՝ Արևմուտք-Արևելք բախումը, որը կա մեր մեջ: Բայց դա այսօր համաշխարհային միտում է»,- Factor TV-ի հետ զրույցում տեսակետ է հայտնում ՀՀ ժողովրդական արտիստ, օպերային երգիչ Բարսեղ Թումանյանը:

Նա շեշտում է՝ շոուներ կարելի է կազմակերպել, ասենք, զբոսաշրջիկների համար, բայց տեղի հանդիսատեսին պետք է նախ և առաջ արժեքավոր բովանդակությամբ սնել։

«Այն, որ օպերային թատրոնի տոմսերն արագ սպառվում են, դա բոլորովին երաշխիք չէ այն բանի, որ ներկայացումները որակյալ են: Բացի այդ՝ տոմսերը պետք է հասանելի ու մատչելի լինեն հանրությանը: Իսկ մեզ մոտ էլիտան հիմնականում աղքատ խավն է, և այդ խավը հնարավորություն չունի թատրոններ, ցուցահանդեսներ, համերգներ գնալու. ամսական 4 համերգի գնա` աշխատավարձը կսպառվի: Հետևաբար պետությունը պետք է իր վրա վերցնի ծախսերը: Որպեսզի հասարակությանը կրթես, տոմսերի համար խելքին մոտ գին է պետք սահմանես»,- ասում է նա:

Հարցին՝ ինչո՞ւ մեր գործարարները, բիզնեսմենները հետաքրքրված չեն և չեն հովանավորում օպերային արվեստը, ինչպես դա անում են, օրինակ՝ Եվրոպայի գործարարները, Բարսեղ Թումանյանը պատասխանում է. «Մենք մեր առօրյայի մեջ օր ու գիշեր ռաբիս ենք մտցրել, այլանդակությունների վրա մեծ ծախսեր ենք արել: Մեր օլիգարխը մեղավոր չէ, որ ծնված օրվանից դա է տեսել»:

Օպերային երգիչը, որը, ի դեպ, վերջերս արժանացել է Երևանի պատվավոր քաղաքացու կոչման, խոսում է նաև մեր մայրաքաղաքի խնդիրների մասին. «Ես մեր թամանյանական քաղաքը ձեռք չէի տա, Երևանն ունի իր քաղաքակրթությունը: Իսկ, օրինակ, բարձրահարկ շենքերի անսամբլ կարելի է ստեղծել Երևանից դուրս: Փոքրիկ քաղաքներում, թաղամասերում կարելի է այլ, ժամանակակից քաղաքակրթություն ձևավորել: Մեր քաղաքը մշակութային է և այլ դեմք ստանալու իրավունք չունի: Երևանը դարձավ նյութապաշտների ու ինքնահաստատվել ցանկացողների զոհը»:

Մանրամասները՝ տեսանյութում:

Աննա Բաբաջանյան