08.10.2026 | 11:33
Դատախազությունը պահանջում է ազատել Աբովյան 8/1-ի անշարժ գույքը ընկերության ապօրինի տիրապետումից
ՆԱՏՕ-ն դեռևս չի հաստատել ՌԴ զինված ուժերում հյուսիսկորեական զորքերի ներկայությունը
Քաղաքականություն
18.10.2024 | 21:29
Այս պահին ՆԱՏՕ-ն չի կարող հաստատել հարավկորեական հետախուզության հաղորդագրություններն այն մասին, որ Հյուսիսային Կորեայի զորքերը կռվելու են Ռուսաստանի կողմից Ուկրաինայի դեմ պատերազմում: Այս մասին ասել է դաշինքի գլխավոր քարտուղար Մարկ Ռյուտեն՝ Բրյուսելում կայացած մամուլի ասուլիսում պատասխանելով լրագրողների հարցերին, գրում է DW-ի ռուսական ծառայությունը։
Նա պարզաբանել է, որ սա ՆԱՏՕ-ի պաշտոնական դիրքորոշումն է այս պահին, բայց այն կարող է փոխվել։ Դաշինքը կապի մեջ է Հարավային Կորեայի հետ՝ բոլոր տեղեկությունները ստանալու համար, հավելել է Ռյուտեն։
«Ամեն դեպքում, նույնիսկ եթե Հյուսիսային Կորեան ֆիզիկապես ներկա չէ մարտի դաշտում, օգնում է բորբոքել Ռուսաստանի ագրեսիվ պատերազմն Ուկրաինայի դեմ՝ մյուս այնպիսի պետությունների հետ, ինչպիսիք են Իրանը և Չինաստանը», – հայտարարել է Հյուսիսատլանտյան դաշինքի ղեկավարը։
Հարավկորեական հետախուզության տվյալներով՝ շուրջ 12 հազար հյուսիսկորեացի զինվորներ վերապատրաստվում են Ռուսաստանի արևելյան շրջաններում՝ մասնակցելու Ուկրաինայի պատերազմին, հայտնում է Yonhap գործակալությունը՝ վկայակոչելով հարավկորեական հետախուզության տվյալները։
Թարգմանությունը՝ Տաթև Ֆռանգյանի
