Ուկրաինան Ադրբեջանին իր պայմաններն է առաջադրել Եվրոպա գազի տարանցման համար

Ուկրաինան Ադրբեջանին՝ որպես գազ արտահանողի, իսկ Սլովակիային՝ որպես գնորդի, առաջարկել է սխեմա՝ իր տարածքով Եվրոպա ռուսական գազի այլընտրանքային մատակարարման համար։ Այս մասին գրում է ՌԲԿ-ն՝ վկայակոչելով իր աղբյուրներին։

2023 թվականին Բաքուն արդեն Եվրոպա է արտահանել շուրջ 12 մլրդ խմ գազ, 2024 թվականին նախատեսվում է այդ ծավալը հասցնել 13 մլրդ-ի։

Ըստ առաջարկվող մեխանիզմի՝ վառելիքի ենթադրյալ գնորդը, օրինակ՝ Սլովակիան, գազը գնում է Ադրբեջանից Ռուսաստան կամ Ռուսաստանից Ուկրաինա մուտքի կետից։ Գազի մատակարարն ինքն է բանակցություններ վարում Ռուսաստանի տարածքով գազի փոխադրման շուրջ և այն մղում ուկրաինական ստորգետնյա պահեստարաններ, այնուհետև այն օգտագործում է ըստ իր ընտրության, այդ թվում՝ արտասահմանում վաճառելով: Այս սխեմայում Ուկրաինան հանդես է գալիս ոչ թե տարանցիկ երկիր, այլ վերարտահանող։

Այս առաջարկում կա առանցքային պայման՝ յուրաքանչյուր կողմ պետք է ինքնուրույն պայմանավորվի Ռուսաստանի հետ մատակարարումների անվտանգության հարցում՝ ըստ էության ապահովելով Ուկրաինայի գազատրանսպորտային համակարգի պաշտպանությունը ռազմական գործողությունների համատեքստում։

Լրատվամիջոցի զրուցակիցները նշել են, որ քննարկման գործընթացը դժվար թե կարելի է բանակցություններ անվանել, սակայն թեման բարձրացվում է երկկողմ հանդիպումների ժամանակ։ Առայժմ ո՛չ Ադրբեջանը, ո՛չ Սլովակիան վերջնական պատասխան չեն տվել։

Իրազեկ աղբյուրը նաև հայտնել է Ուկրաինայի տարածքով դեպի Եվրամիություն գազի մատակարարումների նկատմամբ Ադրբեջանի հետաքրքրության նվազման մասին․ Բաքուն արդեն չորս ամիս չի բարձրացնում այդ թեման։

«Կարծում եմ, որ Բաքվի ակտիվության նվազումը կապված է Ռուսաստանի դիրքորոշման հետ, որն այսպես թե այնպես պետք է մասնակցի այս գործընթացում»,- նշել է լրատվամիջոցի զրուցակիցը։

Մոսկվայի և Կիևի միջև 2019 թվականին կնքված գազի տարանցման պայմանագրի ժամկետը լրանում է 2024 թվականի վերջին։ Ուկրաինայի իշխանությունները բազմիցս հայտարարել են, որ չեն երկարաձգելու պայմանագիրը։ ԵՄ-ն նույնպես հայտարարում է, որ դա իրենց չի հետաքրքրում։

Թարգմանությունը՝ Էմմա Չոբանյանի