Զախարովան՝ Ադրբեջանի պաշտպանության դիրքերից․ ինչո՞ւ ՀՀ-ում ԵՄ առաքելությունը երկարաձգելիս հաշվի չի առնվում Բաքվի կարծիքը

Մենք բացասաբար են վերաբերվում ՀՀ-ում տեղակայված ԵՄ քաղաքացիական դիտորդական առաքելությանը։ Այս մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով առաքելության ժամկետի երկարաձգման մասին հարցին։

«Այս առաքելության հակաադրբեջանական, հակառուսական, հակաիրանական նպատակներն ակնհայտ են: Ավելին, դրան միանում են ՆԱՏՕ-ի երկրները: Ակնհայտ է, որ սա աշխարհաքաղաքական նախագիծ է, որն օգտագործվում է տարածաշրջանում հավաքական Արևմուտքի ներկայությունն ամրապնդելու համար։ Նրա նպատակները մեզ համար պարզ են՝ իրավիճակի ապակայունացում և դրա օգտագործումը Հարավային Կովկասի տարածաշրջանի ժողովուրդների դեմ»,- ասել է Զախարովան։

Նա նաև հայտարարել է, թե, իբր, սահմանին փոխհրաձգությունները շարունակվում են։

«Եվրամիության առաքելությունն օտար մարմին է Հարավային Կովկասի համար, տարածաշրջանի առջև ծառացած բոլոր հրատապ խնդիրները պետք է լուծվեն հավաքական ջանքերի միջոցով՝ առանց արտաքին միջամտության։ Եթե ​​ԵՄ առաքելությունն այդքան վճռական է կայունության հասնելու հարցում, ինչո՞ւ մանդատը երկարաձգելու որոշումը, ինչպես նաև առաքելությունը տեղակայելու որոշումն ընդունվել է Բաքվի թիկունքում, ինչո՞ւ հաշվի չի առնվում այն ​​տարածաշրջանային խաղացողի կարծիքը, որն արտաքին դիտորդ չէ և շահագրգռված է կայունությամբ»,- հայտարարել է Զախարովան։

Ըստ նրա՝ ԵՄ առաքելությանը բացարձակապես չեն հետաքրքրում Հայաստանի շահերը։

Թարգմանությունը՝ Էմմա Չոբանյանի