30.04.2026 | 15:42
Եվգենի Լովչևն․ Արսեն Զախարյանը կոտրեց իր ֆուտբոլային կարիերան հանուն արտասահման տեղափոխվելու
Կոբախիձեն ընտրություններից հետո առաջին արտասահմանյան այցը կկատարի Ադրբեջան
Քաղաքականություն
16.01.2025 | 16:35
Վրաստանի վարչապետ Իրակլի Կոբախիձեն հունվարի 17-ին կայցելի Ադրբեջան։ Վրացական «Առաջին ալիք»-ի փոխանցմամբ՝ այս մասին հայտնում է Վրաստանի վարչապետի մամուլի ծառայությունը։
«Բաքու այցի շրջանակում Վրաստանի և Ադրբեջանի վարչապետների գլխավորությամբ տեղի կունենա տնտեսական համագործակցության վրաց-ադրբեջանական միջկառավարական հանձնաժողովի նիստը, որին կմասնակցեն երկու երկրների կառավարությունների անդամները։ Նախատեսվում է դեմ առ դեմ հանդիպում Վրաստանի վարչապետ Իրակլի Կոբախիձեի և Ադրբեջանի նախագահ Իլհամ Ալիևի միջև։ Հանդիպումից հետո առաջնորդները հանդես կգան մամուլի համար համատեղ հայտարարություններով»,- ասվում է հաղորդագրության մեջ։
Վրացական պատվիրակության կազմում են առաջին փոխվարչապետ, էկոնոմիկայի և կայուն զարգացման նախարար Լևան Դավիթաշվիլին, արտաքին գործերի նախարար Մակա Բոչորիշվիլին, շրջակա միջավայրի և գյուղատնտեսության նախարար Դավիթ Սոնգուլաշվիլին, մշակույթի նախարար Թինաթին Ռուխաձեն և կառավարության ղեկավարի աշխատակազմի ղեկավար Լևան Ժորժոլիանին։
Ի դեպ, սա կլինի Իրակլի Կոբախիձեի առաջին արտասահմանյան ուղևորությունը 2024 թվականի հոկտեմբերի 26-ին կայացած խորհրդարանական ընտրություններից հետո։
Հավելենք, որ այսօր Վրաստանի ԱԳ նախարար Մակա Բոչորիշվիլին արտաքին գործերի նախարարի պաշտոնում իր առաջին պաշտոնական այցը կկատարի Բաքու։ Նախատեսվում է նրա հանդիպումն Ադրբեջանի ԱԳ նախարար Ջեյհուն Բայրամովի հետ։
Թարգմանությունը՝ Էմմա Չոբանյանի
