03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Բալասանյանի որդու նկատմամբ 70 մլն դրամ գրավ և տնային կալանք է կիրառվել
Հասարակություն
14.10.2024 | 17:36
Factor.am-ին նոր մանրամասներ են հայտնի դարձել Գյումրիի նախկին քաղաքապետ Սամվել Բալասանյանի ընտանիքին առնչվող քրեական գործից։ Բալասանյանի որդին՝ Խաչատուր Բալասանյանն ազատ է արձակվել 70 մլն դրամ գրավի դիմաց, սակայն նրա նկատմամբ տնային կալանք է կիրառվել։ Այս տեղեկությունը Factor.am-ին փոխանցում են իրավապահ համակարգի աղբյուրները՝ նշելով, որ Քննչական կոմիտեն Խաչատուր Բալասանյանին կալանավորելու միջնորդություն է ներկայացրել, որը դատարանը մերժել է։
Ավելի վաղ գրել էինք, որ Խաչատուր Բալասանյանը «Զվարթնոց» օդանավակայանում ԱՄՆ մեկնելիս ձերբակալվել է ՔԿ-ում քննվող մի գործի շրջանակներում, որն առնչվում է «Սև բերդ» պատմական շինության սեփականաշնորհմանը։ Այն այժմ պատկանում է Բալասանյաններին։
Հոկտեմբերի 12-ին Factor.am-ը հայտնեց, որ այս գործի շրջանակներում ձերբակալվել են նաև Գյումրու ներկա փոխքաղաքապետ Սուրեն Ջանոյանն ու Ռուբեն Սանոյանը։ Այսօր Factor.am-ին հայտնի դարձավ, որ դատարանը մերժել է նաև նրան կալանավորելու միջնորդությունը՝ նրան ազատ արձակելով 20 մլն դրամ գրավի դիմաց և կրկին սահմանելով տնային կալանք։ Սուրեն Ջանոյանը Բալասանյանների թիմից է, երկար տարիներ աշխատել է նրանց պատկանող «Գյումրի գարեջուր» ընկերությունում։ Նախկին փոխքաղաքապետ Ռուբեն Սանոյանն ազատ էր արձակվել ձերբակալությունից որոշ ժամանակ անց։ Նա Սամվել Բալասանյանի փեսան է՝ քրոջ ամուսինը։ Նրա դուստրը՝ Լուսինե Սանոյանը, Գյումրու քաղաքապետի առաջին տեղակալն է։
Factor.am-ի՝ իրավապահ համակարգի աղբյուրների փոխանցմամբ, այս գործով ձերբակալվել է ևս մեկ անձ, որը ևս փոխկապակցված է Բալասանյանների հետ։
Նարեկ Կիրակոսյան
