07.10.2026 | 23:48
Արթուր Դանիելյանը կալանավորվեց
ԵԽԽՎ-ում Ադրբեջանի վերաբերյալ Լիտվայի ԱԳ նախարարի հայտարարությունները Բաքուն «անհիմն և անընդունելի» է որակել
Քաղաքականություն
03.10.2024 | 22:13
ԵԽԽՎ նստաշրջանի ընթացքում Լիտվայի արտաքին գործերի նախարար Գաբրիելիուս Լանդսբերգիսի կողմից Ադրբեջանի մասին արտահայտած տեսակետները «լիովին անհիմն են և անընդունելի»։ Այս մասին հայտարարել է Ադրբեջանի ԱԳՆ խոսնակ Այխան Հաջիզադեն։
«Կցանկանայիքն հիշեցնել Լիտվայի արտաքին գործերի նախարարին, որը նշել է Ադրբեջանի ու Եվրոպայի խորհրդի միջև համագործակցության փակուղային վիճակը, կոչ է արել ԵԽԽՎ-ի հետ երկխոսել բաց հարցերը լուծելու համար, որ երկխոսությունը դադարեցվել է և հանգեցրել փակուղու ոչ թե Ադրբեջանը, այլ ԵԽԽՎ 76 պատգամավորները, որոնք պաշտպանել են Վեհաժողովում ադրբեջանական պատվիրակության լիազորությունները կասեցնելու անարդար և իրավական տեսակետից կասկածելի նախաձեռնությունը։ Նույնիսկ այդ հայտնի քայլից հետո, որը տեղի ունեցավ Եվրոպական խորհրդի կանոնադրության խախտման հետևանքով՝ ԵԽԽՎ-ն գերազանցելով իր լիազորությունները, ադրբեջանական կողմը դրսևորել է բաց երկխոսություն տարբեր ուղիներով և անկեղծ շահագրգռվածություն իրավիճակի հանգուցալուծման հարցում։ Ակնհայտ է, որ լիտվական կողմը, որը ԵԽ Նախարարների կոմիտեի նախագահն է, բոլորովին մտահոգված չէ ԵԽԽՎ-ում Ադրբեջանի իրավունքներով»,- ասել է Ադրբեջանի ԱԳՆ խոսնակը։
Նա հավելել է, թե հատկապես Արցախի գրավումից հետո ԵԽԽՎ-ն վարկաբեկում է Ադրբեջանին, և որ կառույցում ներկայացված լինելն Ադրբեջանի իրավունքն է, որը պետք է ապահովվի անվերապահորեն։
«Նշելով, որ Ադրբեջանի Ղարաբաղի շրջանից կամավոր Հայաստան մեկնած հայազգի անձանց իրավունքները պաշտպանված են Մարդու իրավունքների եվրոպական կոնվենցիայով, և կարևոր է հարգել նրանց վերադարձի իրավունքը, Լիտվայի նախարարը, չգիտես ինչու, չի խոսում Հայաստանի տարածքից այս կամ այն պատճառով վտարված ավելի քան 300 հազար ադրբեջանցիների իրավունքների մասին։ Նման կողմնակալ դիրքորոշմամբ ելույթ ունենալու փոխարեն՝ ավելի լավ կլիներ, որ լիտվացի նախարարը կենտրոնանար իր գործունեության վրա և ԵԽԽՎ-ին կոչ աներ անհրաժեշտ քայլեր ձեռնարկել՝ Ադրբեջանի հետ երկխոսությունն ու համագործակցությունը վերականգնելու համար»,- հայտարարել է Ադրբեջանի ԱԳՆ խոսնակը։
Հիշեցնենք՝ Լիտվայի ԱԳ նախարարը հայտարարել էր, որ Ադրբեջանի ու ԵԽ-ի համագործակցությունը մտել է փակուղի։
«Մենք անհանգստացած ենք Ադրբեջանում խոսքի ազատության իրավունքի խախտման մասին հաղորդումներով»,- ասել էր Լանդսբերգիսը՝ մատնանշելով անհամաչափ քրեական պատժամիջոցները նրանց նկատմամբ, որոնք փորձել են օգտագործել խոսքի ազատությունը:
Թարգմանությունը՝ Էմմա Չոբանյանի
