06.04.2026 | 23:30
Հրդեհ Թաիրով բնակավայրում. այրվել է ավտոմեքենա
ԱՄՆ-ն ու Իսրայելը քննարկում են Եմենում և Սիրիայում իրանական ուժերին հարվածելու հարցը. Politico
Քաղաքականություն
03.10.2024 | 23:30
ԱՄՆ-ն ու Իսրայելը քննարկում են Եմենում և Սիրիայում Իսլամական հեղափոխության պահապանների կորպուսի (ԻՀՊԿ) ստորաբաժանումների վրա հարձակվելու հնարավորությունը՝ Իրանին ռազմական պատասխան տալու շրջանակում: Այս մասին գրում է Politico պարբերականը՝ հղում անելով ԱՄՆ նախագահի անանուն խորհրդականներին։
Պարբերականի զրուցակիցների խոսքով՝ կողմերը դիտարկում են հրթիռային հարվածը՝ որպես պատասխան Իրանի կողմից Իսրայելի տարածքի վրա հրթիռային հարձակումներին։ Տարբերակներից զրուցակիցները նշում են Իրանի կողմից աջակցվող կազմավորումներին կամ ուղղակիորեն Իսլամական հեղափոխության պահապանների կորպուսի ուժերին Եմենում կամ Սիրիայում հնարավոր հարվածը։
ԱՄՆ նախագահի օգնականներն ասել են, որ Վաշինգտոնը «գերադասում է» Իսրայելի սահմանափակ պատասխանն Իրանի հրթիռային հարձակմանը: Թերթի զրուցակիցներից երկուսն ասել են, որ այս պատասխանը հարմար է ԱՄՆ-ին։
Հոկտեմբերի 1-ի երեկոյան Իրանն ավելի քան 180 հրթիռ է արձակել Իսրայելի ուղղությամբ։ Իրանի թիրախները ներառում էին իսրայելական օդուժի երկու բազա և Մոսադի շտաբը: Իսրայելական բանակի տվյալներով՝ վերջինը չի տուժել։ Իսրայելում հարձակման հետևանքով մեկ մարդ է զոհվել, երկուսը՝ վիրավորվել։
Ըստ Axios-ի՝ Իսրայելի իշխանությունները «նախատեսում են ինքնուրույն» արձագանքել Իրանին, սակայն մտադիր են համաձայնեցնել իրենց ծրագրերը Միացյալ Նահանգների հետ՝ պայմանավորված իրավիճակի ռազմավարական հետևանքներով։ Axios-ի զրուցակիցները նշել են, որ Իսրայելի պատասխան հարձակումը կպահանջի պաշտպանական համագործակցություն ԱՄՆ կենտրոնական հրամանատարության հետ և ավելի շատ զինամթերք իսրայելական օդուժի համար։
Թարգմանությունը՝ Տաթև Ֆռանգյանի
