15.10.2026 | 15:50
Ուկրաինայի ՊՆ-ն հայտնել է Starlink համակարգերի աշխատանքի լիովին վերականգնման մասին
«Կարմիր մահիկի» ընկերակցությունը հանդես է եկել Հայաստանում բուժարան բացելու առաջարկությամբ
Հասարակություն
12.07.2017 | 13:14
ՀՀ առողջապահության նախարար Լևոն Ալթունյանը երեկ ընդունել է Իրանի Իսլամական Հանրապետության «Կարմիր մահիկի» ընկերակցության նախագահ Սեյեդ Ամիր Մոհսեն Զիայի գլխավորած պատվիրակությանը և ՀՀ-ում ԻԻՀ արտակարգ և լիազոր դեսպան Սեյեդ Քազեմ Սաջջադին: Այս մասին տեղեկացրին ՀՀ առողջապահության նախարարությունից:
Հանդիպման ընթացքում նախարարին ներկայացվել է, որ արդեն 95 տարի գործող «Կարմիր մահիկն» ունի 2 մլն կամավոր և 9 հազար հաստիքային աշխատող։ Աշխարհի շատ երկրներում ներկայացված ընկերակցությունը, բացի աղետների ռիսկի նվազեցմանը և արտակարգ պատահարներին ու աղետներին արձագանքմանը, նաև տարբեր երկրներում գործող կլինիկաներ, բուժարաններ ու հեմոդիալիզի կենտրոններ ունի։
«Անհրաժեշտ սարքավորումներով ու դեղորայքով ապահովված մեր բուժարաններն անվճար սպասարկում են սոցիալապես անապահով բնակչությանը»,-նշել է Սեյեդ Ամիր Մոհսեն Զիաին` հավելելով, որ պատրաստ են նման ծրագիր սկսելու և զարգացնելու նաև Հայաստանում։
Բարձր գնահատելով ինչպես «Կարմիր մահիկի» ընկերակցության բարեսիրական գործունեությունը, այնպես էլ Իրանում առողջապահության ոլորտի առաջընթացը` Լևոն Ալթունյանը պարաստակամություն է հայտնել նպաստելու հարևան երկրի հետ առողջապահության ոլորտում համագործակցության ընդլայնմանն ու զարգացմանը։
Հանդիպման ընթացքում քննարկվել են նաև դեղերի արտադրության, բժշկական պարագաների ու դեղերի ներկրման և արտահանման ոլորտում համագործակցության հնարավորությունները։
Հայաստանում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին ևս առողջապահության ոլորտում երկու երկրի միջև արդեն իսկ զարգացող փոխգործակցության ընդլայնմանը նպաստելու իր ցանկությունն է հայտնել։
Ամփոփելով հանդիպումը` ՀՀ առողջապահության նախարար Լևոն Ալթունյանը նշել է, որ կքննարկվեն Հայաստանում բուժարան բացելու իրանցի գործընկերների կողմից ներկայացված ընդունելի առաջարկի մանրամասներն ու կազմակերպական հարցերը։
