19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
Մատներս կտրել են, որ պրոթեզավորեն․ Արցախի բենզինի պահեստի պայթյունից մեկ տարի անց պատճառը անհայտ է. ՏԵՍԱՆՅՈՒԹ
25.09.2024 | 20:45
Ուղիղ մեկ տարի առաջ՝ 2023-ի սեպտեմբերի 25-ին, Ստեփանակերտ-Ասկերան ճանապարհին տեղի ունեցած պայթյունի հետևանքով Գևորգ Գասպարյանը տարբեր աստիճանի այրվածքներ է ստացել։ Արցախի հայերն Ադրբեջանի հարձակումից հետո բռնել էին գաղթի ճամփան, բայց ավելի քան 9 ամիս շրջափակման մեջ մնալուց հետո մեքենաների համար վառելիք գտնելը բարդ խնդիր էր։ Տուն ու տեղ կորցրած արցախցիներին այդ օրը ևս մեկ դաժան լուր ցնցեց՝ վառելիքի պահեստի պայթյունը 218 մարդու կյանք է խլել։ Հիմնականում՝ վարորդներ, որոնք եկել էին ՀՀ հասնելու համար վառելիք հայթայթելու։
120 մարդ մարմնական վնասվածքներ էր ստացել, հիմնականում՝ այրվածքների տեսքով։ Նրանցից ոմանք մինչև օրս շարունակում են վերականգնողական բուժումը։
Բուժառուներն ամեն օր այցելում են Առողջապահության նախարարության «Այրվածքաբանության և մաշկաբանության ազգային կենտրոն», անցնում կինեզոթերապիա և ֆիզոթերապիա։ Կենտրոնում վերականգնողական բուժում է ստանում 10 պացիենտ:
Այրվածքաբանության կենտրոնի փոխտնօրեն Կարինե Բաբայանը նշում է՝ բուժհաստատություն տեղափոխված հիվանդների 50 տոկոսը ծանր վիճակում է եղել, վերքերը՝ խորը, վնասվածքների մակերեսը՝ մեծ։ Վերականգնողական բուժման փուլերից հետո բժիշկը գնահատում է բուժառուի վիճակը և նոր միայն կատարվում է պլաստիկ վիրահատություն։
Պայթյունից անգամ 1 տարի անց տուժածները չեն մոռանում այդ օրվա սարսափը։ Իսկ ինչի՞ց կարող էր լինել պայթյունը, դեռևս միայն բացառում են մինչ այս հնչած վարկածները։ Մեկ տարի անց հարցի պատասխանը չունեն նաև իրավապահները։
Քննչական կոմիտեից Factor TV-ին փոխանցեցին միայն, որ պայթյունի գործով կա նախաձեռնված քրեական վարույթ, որով նախաքննությունը շարունակվում է։ Սակայն այս փուլում նախաքննության տվյալների մասին տեղեկատվություն չի հրապարակվում, ըստ իրավապահ կառույցի՝ նախաքննության շահերից ելնելով։ Մինչ օրս հայտնի չէ նաև առնվազն 21 անձի ճակատագիրը․նրանք չկան ո՛չ վիրավորների, ո՛չ էլ զոհերի ցանկում։
Մանրամասները՝ տեսանյութում։
Անի Թամրազյան
