22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Ուկրաինան ՌԴ-ի հետ հակամարտության կարգավորման հարցում որպես միջնորդ ընտրել է Հնդկաստանը․ Politico
Քաղաքականություն
25.09.2024 | 17:22
Նյու Յորք ուղևորությունն Ուկրաինայի նախագահ Վլադիմիր Զելենսկիին հնարավորություն տվեց ոչ միայն ներկայացնել իր «հաղթական ծրագիրը» արևմտյան դաշնակիցներին, այլև քննարկել պատերազմի ավարտի մեկ այլ խաղաղ տարբերակ։ Այս տարբերակի իրականացման հարցում միջնորդ է ընտրվել Հնդկաստանը, հայտնում է Politico պարբերականը։
Ուկրաինայի և Հնդկաստանի միջև դիվանագիտական հարաբերությունները ծաղկում են. Վլադիմիր Զելենսկին և վարչապետ Նարենդրա Մոդին երկուշաբթի երեկոյան հանդիպել են Նյու Յորքում և օգնականների հետ միասին քննարկել խաղաղության համաձայնագրին հասնելու ուղիները։ Հիմնական հարցերից է եղել Զելենսկիի առաջարկած խաղաղության բանաձևի իրականացումը և Ուկրաինայի հարցով խաղաղության երկրորդ գագաթնաժողովի նախապատրաստումը, գրել է X-ում Ուկրաինայի նախագահը։
«Մենք ըստ էության քննարկել ենք առկա հնարավորությունները։ Ես շնորհակալ եմ մեր ինքնիշխանությանն ու տարածքային ամբողջականությանը հստակ աջակցության համար»,- նշել է նա։
Կիևը մեծ հույսեր է կապում, որ Հնդկաստանը կհասնի իրեն հարմար խաղաղության համաձայնագրի, Politico-ին ասել է ուկրաինացի բարձրաստիճան պաշտոնյան: Նա նշել է, որ Մոդին մեկ ամիս առաջ Ուկրաինայի մայրաքաղաքում կայացած բանակցությունների ժամանակ հասկացրել է, որ թեև Ուկրաինան անխուսափելիորեն պետք է փոխզիջման գնա որոշ հարցերի շուրջ՝ ներխուժումը դադարեցնելու համար, սակայն պատերազմը դադարեցնելու ցանկացած առաջարկ չպետք է ներառի տարածքների հանձնում Ռուսաստանին:
Հնդիկներն այդ մասին հրապարակայնորեն հաստատեցին օգոստոսի վերջին Մոդիի այցի ժամանակ. երկրի ԱԳՆ-ն զեկուցել է խաղաղության բանաձևի քննարկման մասին, որն առաջնահերթություն է տալիս Ուկրաինայի տարածքային ամբողջականությանը և ռուսական զորքերի դուրսբերմանը:
Ինքը՝ վարչապետ Մոդին, Զելենսկիի հետ հանդիպման ժամանակ ասել է. «Մենք շատ բարձր և հստակ հայտարարում ենք, որ աջակցում ենք ինքնիշխանության և տարածքային ամբողջականության հարգմանը։ Սա մեր առաջնահերթությունն է»:
Չնայած գրկախառնությանը, որով Մոդին փոխանակվեց Վլադիմիր Պուտինի հետ հուլիսին Մոսկվա կատարած այցի ժամանակ և առաջացրեց Զելենսկիի կշտամբանքը, Կիևը հետագայում սկսեց Հնդկաստանը դիտարկել որպես իդեալական միջնորդ Կրեմլի հետ հարաբերություններում, եզրափակում է Politico-ն։
Թարգմանությունը՝ Տաթև Ֆռանգյանի
